मंगळवार, 1 सप्टेंबर 2026
(फोटो सौजन्य -सोशल मीडिया)
विशेष म्हणजे, या शोच्या माध्यमातून चाहते पहिल्यांदाच रोहित शर्माला रिअॅलिटी शोचे सूत्रसंचालन करताना पाहणार आहेत. त्यामुळे क्रिकेटच्या मैदानावर आपल्या खेळाने प्रेक्षकांना भुरळ घालणारा ‘हिटमॅन’ आता छोट्या पडद्यावर कसा रंग भरतो, याकडे सर्वांचे लक्ष लागले आहे.
शोच्या घोषणेचा प्रोमो सोशल मीडियावर शेअर करण्यात आला आहे. या प्रोमोमध्ये रोहित शर्माचे चाहते त्याला भेटताना दिसत आहेत. यावेळी चाहते त्याला त्याचा प्रसिद्ध ‘कोई भी गार्डन में नहीं घूमेगा’ हा डायलॉग बोलण्याची विनंती करताना दिसतात.
आपल्या या डायलॉगची वारंवार होणारी मागणी ऐकून रोहितही वैतागलेल्या मजेशीर अंदाजात प्रतिक्रिया देताना दिसतो. आपल्या तोंडून एक-दोन ओळी काय बाहेर पडल्या, त्या व्हायरल झाल्या आणि लोक त्याचे चाहते झाले, असं म्हणत आता तर संपूर्ण शोच येत असल्याचं तो प्रोमोमध्ये सांगतो. रोहितचा हा विनोदी अंदाज चाहत्यांना चांगलाच पसंत पडत आहे.
View this post on Instagram
रोहित शर्माचा हा आगामी शो 19 सप्टेंबर 2026 पासून सुरू होणार आहे. हा शो सोनी वाहिनी आणि सोनी लिव्ह या दोन्ही माध्यमांवर पाहता येणार आहे. सर्व वयोगटातील प्रेक्षकांना डोळ्यासमोर ठेवून हा शो तयार करण्यात आल्याची माहिती आहे.
मात्र, या शोच्या फॉरमॅटबाबत अद्याप निर्मात्यांकडून फारशी माहिती समोर आलेली नाही. शो सुरू होण्यास अजून काही दिवस बाकी असल्याने आगामी काळात निर्माते शोच्या फॉरमॅटसह इतर महत्त्वाच्या गोष्टींचा खुलासा टप्प्याटप्प्याने करण्याची शक्यता आहे.
रोहित शर्माने यापूर्वी कोणत्याही रिअॅलिटी शोचं सूत्रसंचालन केलेलं नाही. आतापर्यंत त्याने क्रिकेटच्या मैदानावर आपल्या धडाकेबाज फलंदाजीने चाहत्यांचं मनोरंजन केलं आहे. आता मात्र क्रिकेटच्या पिचनंतर तो छोट्या पडद्यावर आपल्या नव्या भूमिकेत प्रेक्षकांसमोर येणार आहे.
शोचा प्रोमो समोर आल्यानंतर सोशल मीडियावरही त्याची जोरदार चर्चा सुरू झाली आहे. प्रोमोमध्ये रोहितचा दिसणारा फनी अंदाज चाहत्यांना विशेष आवडला असून, टीव्हीवर त्याचा हा नवा अवतार पाहण्यासाठी प्रेक्षक उत्सुक आहेत. त्यामुळे क्रिकेटनंतर मनोरंजनाच्या विश्वात रोहित शर्मा किती धमाल करतो, हे पाहणं उत्सुकतेचं ठरणार आहे.
