Shravan Recipe : श्रावणी सोमवारच्या उपवासाला घरी बनवा चविष्ट आणि कुरकुरीत बटाटा- रताळ्याचे काप

श्रावण महिना अखेर सुरु झाला आहे. हा महिना व्रत-वैकल्याचा महिना म्हणून ओळखला जातो. या महिन्यात तुम्हीही उपवास करत असाल तर आणि तेच तेच उपवासाचे पदार्थ खाऊन कंटाळा आला असेल तर आजची ही हटके रेसिपी एकदा नक्की करून पहा. घरातील सर्वांनाच फार आवडेल. (फोटो सौजन्य: Pinterest)

नुकताच श्रावण महिना सुरू झाला आहे. हा महिना संपूर्णपणे भगवान शिवाला समर्पित केला जातो. या महिन्यात अनेकजण व्रत वैकल्य करत असतात. या महिन्यातील श्रावणी सोमवाराला फार महत्त्व असते. श्रावणी सोमवाराला लोक भगवान शंकराची पूजा-अर्चा करत उपवास करत असतात. आता उपवास म्हटला की, तेच तेच बोरींग उपवासाचे पदार्थ आठवू लागतात जसे की, साबूदाणा खिचडी.

मात्र तुम्हालाही उपवासाचे तेच तेच पदार्थ खाऊन कंटाळा आला असेल तर आता चिंता सोडा , कारण आज आम्ही तुमच्यासाठी उपवासाची एक हटके रेसीपी घेऊन आलो आहोत. या रेसीपीचे नाव आहे कुरकुरीत बटाटा-रताळ्याचे कुरकुरीत काप. बटाट -रताळ्यापासून तयार केला जाणार हा पदार्थ चवीला फार छान लागतो. तसेच या रेसीपीला तयार होण्यासाठी अधिक साहित्याचीही गरज भासत नाही. चला तर मग यासाठी लागणारे आवश्यक साहित्य आणि कृती जाणून घेऊयात.

साहित्य

• बटाटे – 2
• रताळी – पाव किलो
• मीठ – चवीनुसार
• तिखट – 1 चमचा
• पिठीसाखर – 1 चमचा
• राजगिरा पीठ – 1 वाटी
• तेल – अर्धी वाटी
• लिंबाचा रस – अवडीनुसार

हेदेखील वाचा – Healthy Recipe: दिवसभर दिसाल उत्साही! मोड आलेल्या कडधान्यापासून बनवा ‘हा’ स्वादिष्ट पदार्थ

कृती

• बटाटा-रताळ्याचे काप तयार करण्यासाठी सर्वप्रथम बटाटे आणि रताळे स्वछ पाण्याने धुवून घ्या
• यानंतर दोन्हींचे गोलाकार असे पातळ काप करून घ्या
• यानंतर एका ताटात राजगिऱ्याचे पीठ घेऊन त्यात तिखट, मीठ आणि पिठीसाखर घाला आणि मिक्स करा
• आवडीनुसार तुम्ही यात लिंबाचा रसदेखील घालू शकता
• आता बटाटा-रताळ्याचे काप यात मिसळून हा मसाला या कापांना छान लावून घ्या
• त्यानंतर दुसरीकडे गॅसवर तवा ठेवा आणि यात तेल टाका
• आता तव्यावर एक एक काप टाका आणि मंद आचेवर हे काप छान कुरकुरीत भाजून घ्या
• हे काप भाजताना गॅसची फ्लेम मंदच असूद्यात
• दोन्ही बाजूंनी छान कुरकुरीत भाजून झाल्यानंतर तुमचे काप तयार होतील
• तयार काप प्लेटीमध्ये काढून खाण्यासाठी सर्व्ह करा