फोटो सौजन्य: iStock
संगमनेर शहर व परिसरात बेकायदेशीर कत्तलखाने खुलेआम सुरूच असून कत्तलखान्यातून दररोज अनेक जनावरांची कत्तल केली जात आहे. या कत्तलखान्यात तयार होणारे तब्बल १० हजार किलो गोमांस दररोज मुंबई व अन्य ठिकाणी पाठविले जात आहे. पोलिसांना याबाबत कल्पना असूनही ते कत्तलखान्यांवर कारवाई करत नाहीत. विशेष म्हणजे वरिष्ठ पोलिस अधिकारीही दुर्लक्ष करत असल्याने नागरिकांतून संताप व्यक्त होत आहे.
गोमांस निर्मितीचे संगमनेर शहर हे राज्यातील प्रमुख केंद्र म्हणून ओळखले जाते. शहरातील कोल्हेवाडी रोड, जोरवे रोड, जमजम कॉलनी या परिसरात अनेक वर्षांपासून खुलेआम बेकायदेशीर कत्तलखाने सुरू आहेत. राज्यात गोहत्या बंदी कायदा अस्तित्वात असतानाही संगमनेर शहरात मात्र या कायद्याचे खुलेआम उल्लंघन करून शेकडो जनावरांची कत्तल केली जात आहे.
या कत्तलखान्यांवर अनेकदा कारवाया करूनही हे कत्तलखाने सुरूच असतात. हिंदुत्ववादी संघटनांनी या कत्तलखान्यांच्या विरोधात अनेकदा आवाज उठवला. मात्र तात्पुरती कारवाई करण्यात येते आणि त्यानतंर पोलिस या कत्तलखान्यांकडे दुर्लक्ष करतात. संगमनेर विधानसभा मतदारसंघात प्रदीर्घ काळानंतर परिवर्तन झाले. हिंदुत्ववादी विचारांचे आमदार या मतदारसंघातून निवडून आले. यामुळे शहरातील सर्व कत्तलखाने बंद होतील अशी अपेक्षा नागरिकांना होती. आमदार अमोल खताळ यांनी या कत्तलखान्यांबाबत विधानसभेत आवाजही उठवला होता. यानंतर हे कत्तलखाने काही दिवस बंद करण्यात आले. मात्र काही दिवसांनी हे कत्तलखाने पूर्ववत सुरू झाले आहेत.
संगमनेर शहरातील जमजम कॉलनी परिसरातील गल्ली क्रमांक दहामध्ये गेल्या काही दिवसांपासून कत्तलखाना सुरू आहे. शहरातील दोन प्रमुख कत्तलखाना चालक हा कत्तलखाना चालवत आहे. कत्तलखान्यावर कारवाई होऊ नये हे दोघे तत्पर असतात. यासाठी मोठ्या प्रमाणावर आर्थिक मलिदा देण्याचे काम यांच्या माध्यमातून होत असल्याची व त्यामुळेच पोलीस या कत्तलखान्यांवर कारवाई करण्यास टाळाटाळ करत असल्याची चर्चा उघड होत आहे.
संगमनेर शहरातून तयार होणारे गोमांस दररोज मुंबई व इत्तर गावांमध्ये वेगवेगळ्या वाहनांमधून पाठवण्यात येत आहे. गेल्या काही दिवसांपासून या कत्तलखान्यामधून दररोज तब्बल दहा हजार किलो गौमांस राज्यातील विविध शहरांमध्ये पाठवले जात आहे.
शहरातील या कत्तलखान्यामधून दररोज हजारो किलो गोमांस तयार होत असताना संगमनेर ग्रामीणमध्ये विविध घटना घडताना दिसतात. कत्तलखान्यांसाठी तालुक्यातील कुरण येथून मोठ्या प्रमाणावर जनावरांचा पुरवठा केला जातो. कुरण येथील काही व्यापारी जनावरांची खरेदी करून ही जनावरे कत्तलखान्यांना पुरवतात.
