संगमनेर तालुक्यातील स्वयंघोषित महाराजविरोधात अंनिस आक्रमक,
संगमनेर अध्यात्म आणि दैवी शक्तीच्या नावाखाली सर्वसामान्यांची फसवणूक करणाऱ्या भोंदूबाबांचे पेव फुटले असतानाच, आता संगमनेर तालुक्यातील वडगावपान (दत्तधाम) येथील एका स्वयंघोषित ‘गडगे महाराज’ विरोधात महाराष्ट्र अंधश्रद्धा निर्मुलन समितीने (अनिस) आक्रमक पवित्रा घेतला आहे. या भोंदूबाबाकडून लोकांचे आर्थिक आणि मानसिक शोषण होत असून, त्याच्यावर तातडीने फौजदारी गुन्हे दाखल करण्याची मागणी अंधश्रद्धा निर्मूलन समितीने केली आहे. या संदर्भात समितीतर्फे जिल्हाधिकारी व संगमनेर उपविभागीय पोलिस अधिकाऱ्यांना निवेदन देण्यात आले आहे.
पोलिसांना दिलेल्या निवेदनात बरेच गंभीर आरोप करण्यात आले असल्यामुळे प्रशासन काय कारवाई करते, याकडे तालुक्याचे लक्ष लागले आहे. वडगावपान येथे ‘दत्तधाम सरकार’ या नावाने एक आश्रम चालवला जातो. यात स्वतःला गडगे महाराज म्हणवून घेणारा एक व्यक्ती वास्तव्यास आहे. या बाबाकडे कोणतीही वैद्यकीय पदवी नसताना तो आजार बरे करण्याचे दावे करतो. लोकांवर फसवे उपचार करतो, असा आरोप अंनिसच्या ॲड. रंजना गवांदे, अशोक गवांदे, प्रशांत पानसरे आणि अमोल खरात यांनी निवेदनात केला आहे. आश्रमात मोठ्या प्रमाणावर स्त्री-पुरुषांची वर्दळ असते आणि अनेकांचा तेथे मुक्काम असतो. अंनिसच्या मते अध्यात्माच्या नावाखाली बाबा येणाऱ्या भक्तांकडून मोठी रक्कम उकळतो.
या बाबाने परिसरात आपली दहशत निर्माण केली आहे. त्यामुळे फसवणूक झालेले शेकडो लोक तोंडी तक्रार करत असले तरी, भीतीपोटी कोणीही लेखी तक्रार देण्यास पुढे येत नाहीत. कोणताही वैद्यकीय आधार नसताना लोकांना औषधोपचार देऊन त्यांच्या जिवाशी खेळले जात आहे.
‘दतधाम सरकार’ ही दुसरी ‘खरात फाईल’ होवू नये, यासाठी अनिसने महाराष्ट्र नरबळी आणि इतर अमानवीय, अनिष्ट व अघोरी प्रथा आणि जादूटोणा विरोधी कायदा, ड्रग्ज ॲड मॅजिक रेमेडीज ॲक्ट (जादूटोणा सदृश औषधोपचार प्रतिबंधक कायदा), महाराष्ट्र वैद्यकीय व्यावसायिक अधिनियम (बोगस डॉक्टर्स ॲक्ट) गुन्हा दाखल करण्याची मागणी केली आहे, तक्रारीनंतर संगमनेर पोलीस प्रशासन या ‘भोदू बाबा’वर काय कारवाई करते, याकडे संपूर्ण जिल्ह्याचे लक्ष लागले आहे. जनप्रबोधनासाठी जादूटोणा विरोधी कायद्याच्या प्रभावी अमलबजावणीसाठी प्रशासनाला सहकार्य आहे.
मुख्यमंत्री सहाय्यता निधीची नवीन ऑनलाईन प्रणाली; मदत आणि उपचाराला मिळणार गती
संगमनेर तालुक्यातील वडगाव पान येथील गडगे महाराज (दत्तधाम सरकार) – यांच्यावरील भोंदूगिरी संदर्भाने महाराष्ट्र अंधश्रद्धा निर्मूलन समितीचे निवेदन प्राप्त झाले आहे. त्या अनुषंगाने शहानिशा करून पुढील योग्य ती कार्यवाही करण्यात येईल, अशी माहिती संगमनेरचे उपविभागीय पोलिस अधिकारी डॉ. कुणाल सोनवणे यांनी दिली.
66 दत्तधाम सरकारमध्ये काय चालते, हे येऊन पाहिले पाहिजे, आपल्याकडे प्रार्थना, संकल्प, ध्यानसाधना चालते. दत्त दिगंबर सेवाभावी संस्था आहे. संस्थेमध्ये तीन डॉक्टर आहेत. औषधी देण्यासाठी डॉक्टर असतात. ध्यानसाधना घेणे, मनातील नकारात्मकता ध्यान साधनेद्वारे बाहेर काढणे, हे माझे काम आहे. देव आपल्या हृदयात आहे, ही शिकवण आपल्याकडे आहे.
