शनिवार, 17 ऑक्टोबर 2026
दुष्काळाचा हाहाकार! पाच दुष्काळ पाहिलेल्या ९५ वर्षीय वृद्धाची हृदयद्रावक हाक; 'अशी परिस्थिती कधीच पाहिली नाही'
Nagpur News : करदात्यांना धाक नाही, विश्वासाचे बळ! जीएसटीचा पाया विस्तारण्यासाठी नवी मोहीम
जुन्या आणि आजच्या दुष्काळात मोठा फरक- आपल्या आयुष्यात तब्बल पाच मोठे दुष्काळ अनुभवणाऱ्या सुधाकर शिंदे यांनी जुन्या काळातील आणि आजच्या दुष्काळातील विदारक तफावत मांडताना काळजाला हात घातला. पूर्वी जेव्हा दुष्काळ पडायचा, तेव्हा कुठे ना कुठे पिण्याच्या पाण्याची सोय तरी असायची. पण आज परिस्थिती इतकी बिकट झाली आहे की, माणसांना प्यायला पाणी नाही आणि जनावरांना खायला चारा व प्यायला पाणी काहीच उरलेले नाही, अशा शब्दांत त्यांनी आपला तीव्र संताप व्यक्त केला.
सरकारकडून सध्या दुष्काळी परिस्थितीची पाहणी आणि पंचनाम्याचे दावे केले जात असले, तरी प्रत्यक्ष शेतावर परिस्थिती पूर्णपणे वेगळी आहे. सरकारी अधिकारी पिकांची नोंद घ्यायला बांधावर येतात का? यावर उत्तर देताना शिंदे म्हणाले कागदी घोडे अन् मोबाईलचा खेळ सरकारी अधिकारी गावात येतात पण शेतात येत नाहीत. ते म्हणतात ॲपने मोबाईलवर नोंद करा. आता माझ्यासारख्या 95 वर्षांच्या वृद्धाला मोबाईल चालवता येतो का? अधिकाऱ्यांनी स्वतः रानात येऊन पिकांची पाहणी व नोंद करायला हवी.
जनावरांच्या गणतीबाबत सांगताना त्यांनी स्पष्ट केले की, काल एक व्यक्ती आला होता. माझ्याकडे १० गुरं आहेत, त्यांनी नोंद केली आणि सांगितले की ‘मी आजच आलोय, उद्या येणार नाही’. अशा प्रकारे त्रोटक कामे करून अधिकारी निघून जातात; प्रत्यक्ष शेतकऱ्यांच्या समस्या समजून घेण्यासाठी बांधावर कोणीही थांबत नाही.
हरभऱ्याला भुसाही मिळेना- पावसाच्या अभावामुळे शेतातील पिके पूर्णपणे खलास झाली आहेत. शिंदे यांनी सांगितले की, शेतातून काढलेल्या हरभऱ्याच्या पिकातून एक-दोन पोती धान्य तर दूरच, पण जनावरांसाठी भुसासुद्धा निघत नाहीये. पिके वाळून गेल्याने शेतकरी पूर्णपणे कोलमडला आहे.
पालकमंत्र्यांच्या बैठका आणि वास्तवाची दरी- एकीकडे जिल्ह्याचे पालकमंत्री आढावा बैठका घेऊन परिस्थिती सुरळीत असल्याचे भासवत आहेत, तर दुसरीकडे प्रत्यक्ष ग्रामीण भागात पाण्याचा थेंबही उपलब्ध नाही. सरकारी आकडेवारी आणि प्रत्यक्ष बांधावरील वास्तव यामध्ये प्रचंड दरी निर्माण झाली आहे.
…तर माणसं आणि गुरं मरून जातील!-सध्याची परिस्थिती अशीच राहिली आणि सरकारने तातडीने पिण्याचे पाणी, जनावरांसाठी चारा आणि आर्थिक मदत पोहोचवली नाही, तर येत्या काळात पाणी व चाऱ्याअभावी जनावरांसह माणसांचाही जीव जाईल, असा गंभीर इशारा या 95 वर्षीय वृद्ध शेतकऱ्याने दिला आहे. या हृदयद्रावक हाकेनंतर तरी शासन आणि प्रशासन जागे होऊन तातडीने मदत छावण्या व पाण्याचे टँकर सुरू करणार का, याकडे संपूर्ण जिल्ह्याचे लक्ष लागले आहे.
