बुधवार, 21 ऑक्टोबर 2026
अग्निशमन दलाला हायटेक बूस्टर! पालकमंत्री संजय शिरसाट यांचा पुढाकार
पूर्वी उंच इमारतींमध्ये आग लागल्यास मर्यादित साधनांमुळे बचाव व नियंत्रणात अडचणी येत होत्या. अनेकदा अग्निशमन कर्मचाऱ्यांना जीव धोक्यात घालून प्रत्यक्ष आगीच्या ठिकाणी जावे लागत होते. ही गंभीर बाब लक्षात घेऊन पालकमंत्री संजय शिरसाट यांच्या पुढाकारातून जिल्हा नियोजन समितीमार्फत १५.७८ कोटी रुपयांचा निधी उपलब्ध करून देण्यात आला आणि त्यातून ही अत्याधुनिक यंत्रणा खरेदी करण्यात आली.
जर्मन तंत्रज्ञानावर आधारित स्विंग कंपनीचा हा वॉटर टॉवर संच आधुनिक अग्निशमन व्यवस्थेचा अत्यंत महत्त्वाचा भाग मानला जातो. ३६ मीटरपर्यंत उंची गाठणारा हा टॉवर १० ते १२ मजली इमारतींमध्ये लागलेल्या आगीवर थेट आणि प्रभावी फवारा मारू शकतो. त्यावर बसविण्यात आलेले उच्च क्षमतेचे मॉनिटरिंग कॅमेरे, फायबर ऑप्टिक प्रणाली आणि थर्मल सेन्सरमुळे धूर, उष्णता आणि आगीचा अचूक ठाव घेणे शक्य होते. या यंत्रणेचे सर्वात मोठे वैशिष्ट्य म्हणजे रिमोट ऑपरेशन प्रणाली. कंट्रोल पॅनेलद्वारे ऑपरेटर तळमजल्यावरूनच संपूर्ण परिस्थितीचे निरीक्षण करून आगीवर नियंत्रण मिळवू शकतो. त्यामुळे अग्निशमन दलाच्या जवानांना थेट आगीजवळ जाण्याचा धोका मोठ्या प्रमाणात कमी होणार आहे.
संचामधील १४ हजार लिटर क्षमतेचा वॉटर बाउजर सतत पाणीपुरवठा सुनिश्चित करतो, तर समाविष्ट अग्निशमन रोबोट अरुंद, धोकादायक किंवा मानवासाठी अवघड ठिकाणी जाऊन आग विझविण्याचे काम करतो. यामुळे संपूर्ण अग्निशमन प्रक्रिया अधिक जलद, सुरक्षित आणि परिणामकारक बनणार आहे. महानगरपालिकेकडे ही यंत्रणा नुकतीच दाखल झाली असून, तिचे लोकार्पण करण्यात येणार आहे. त्यानंतर संबंधित अधिकाऱ्यांना आणि कर्मचाऱ्यांना विशेष प्रशिक्षण देऊन यंत्रणेचा प्रत्यक्ष वापर सुरू केला जाणार आहे. अग्निशमन यंत्रणा नव्या तांत्रिक युगात प्रवेश करत आहे.
३६ मीटर उंचीपर्यंत पोहोचणारा वॉटर टॉवर, १४ हजार लिटर क्षमतेचा बाउजर आणि अग्निशमन रोबोट यांचा समावेश असलेला हा संच जर्मन तंत्रज्ञानावर आधारित आहे. थर्मल कॅमेरे व फायबर ऑप्टिक प्रणालीमुळे आगीचे अचूक निरीक्षण करता येते. रिमोट ऑपरेशनमुळे सुरक्षित अंतरावरून नियंत्रण मिळविता येते, तर उंच इमारतीमधील आगीवर जलद प्रतिसाद देण्याची क्षमता ही यंत्रणा प्रदान करते.
