शनिवार, 17 ऑक्टोबर 2026
आला मार्च एंडिंग, आता ठेवू नका बिल पेंडिंग! ८१ हजार थकबाकीदारांचा वीजपुरवठा खंडित
मुख्य अभियंता पवनकुमार कछोट हे स्वतः परिमंडलात विविध ठिकाणी दौरे करून शाखा कार्यालयांपर्यंत थकबाकी वसुलीचा आढावा घेत आहेत. थकीत वीजबिलापोटी वीजपुरवठा खंडित करणे व खंडित केलेल्या वीजजोडण्यांची तपासणी करण्यासाठी महावितरणचे सर्व अभियंता, अधिकारी, कर्मचारी सध्या ‘ऑन फिल्ड’ आहेत. एका महिन्याचे वीजबिल थकीत असले तरी बिलाची रक्कम किती आहे हे न पाहता नियमानुसार वीजपुरवठा खंडित करण्याची कारवाई सुरू आहे.
छत्रपती संभाजीनगर शहर मंडलात घरगुती, व्यावसायिक, औद्योगिक व इतर वर्गवारीतील ९८ हजार ८९९ वीज ग्राहकांकडे ४७ कोटी ५८ लाख रुपयांची थकबाकी आहे. त्यात गेल्या महिनाभरात १८ हजार ७९ थकबाकीदारांचा वीजपुरवठा खंडित करण्यात आला. छत्रपती संभाजीनगर ग्रामीण मंडलात घरगुती, व्यावसायिक, औद्योगिक व इतर वर्गवारीतील १ लाख ४८ हजार ४६४ वीज ग्राहकांकडे ४६ कोटी २८ लाख रुपयांची थकबाकी आहे.
ग्रामीण मंडलात ३७ हजार ४५५ थकबाकीदारांचा वीजपुरवठा खंडित करण्यात आला. तसेच जालना मंडलातील घरगुती, व्यावसायिक, औद्योगिक व इतर वर्गवारीतील १ लाख १२ हजार ३८७ वीज ग्राहकांकडे १२८ कोटी ८३ लाख रुपयांची थकबाकी आहे. जालना मंडलात २६ हजार २६७ ग्राहकांचा वीजपुरवठा गेल्या महिनाभरात खंडित करण्यात आला. थकबाकीचा त्वरीत भरणा करावा व बीजपुरवठा खंडित करण्यात येणार आहे.
थकबाकीमुळे वीजपुरवठा खंडित केलेल्या वीजजोडण्यांची विभाग, मंडल व परिमंडल कार्यालयातील अधिकारी व कर्मचाऱ्यांच्या स्वतंत्र पथकांद्वारे पडताळणी सुरू आहे. थकबाकीदार हा शेजाऱ्यांकडून किंवा इतर ठिकाणाहून वायर किंवा केबलद्वारे विजेचा वापर करीत असल्याचे आढळल्यास दोहोंविरुद्ध कारवाई करण्यात येत आहे.
