शनिवार, 24 ऑक्टोबर 2026
पुणे : शिवापूर- कोंढणपूर रस्त्यावरील औद्योगिक पट्ट्यातील शेजारी शेजारच्या दोन कंपन्यांना बुधवारी (दि २७) सकाळी अचानक आग लागली. यामध्ये सुदैवाने यात कोणतीही जीवितहानी झाली नाही मात्र कंपन्यांचे लाखो रुपयांचे नुकसान झाले.
तालुक्यातील रांझे येथील “टफ कोट पॉलिमर्स प्रायव्हेट लिमिटेड” कंपनीला बुधवारी (दि. २७ मार्च) सकाळी १०:१५ च्या सुमारास भीषण आग लागली. या आगीमध्ये कंपनीतील लाखो रुपयांचे साहित्य जळून खाक झाले आहे. या कंपनीमध्ये २७ कामगार काम करत असताना अचानक पेंटच्या बॅलरला आग लागली. काही क्षणातच या आगीने अचानक भीषण रूप धारण केले.
या कंपनीच्या बाजूला असणारी कंपनी “एस्कोपेंट प्रायव्हेट लिमिटेड” या कंपनीला देखील आग लागली. स्थानिकांनी पोलीस स्टेशन आणि डायल ११२ यांना या घटनेची माहिती दिली. राजगड पोलीसांनी घटनास्थळी धाव घेऊन भोर फायर स्टेशन, कात्रज फायर स्टेशन आणि नांदेड सिटी या फायर स्टेशनला माहिती दिली. अग्निशमन दलाने घटनास्थळी पोहोचून आग विझवण्यासाठी शर्तीचे प्रयत्न केले.
कारण अस्पष्ट
कंपनी मध्ये मोठ्या प्रमाणात केमिकल असल्या कारणाने आगीच्या ज्वाला आणि धुराचे लोट पसरले होते. सदर आगीच्या घटनेत कोणतीही जीवितहानी झाली नाही. परंतु या आगीमध्ये कंपनीमधील लाखो रुपयांच्या साहित्यांचे नुकसान झाले आहे. आगीचे कारण अद्याप अस्पष्ट आहे. या प्रकरणी राजगड पोलीस अधिक तपास करत आहेत.
