शनिवार, 17 ऑक्टोबर 2026
फोटो सौजन्य - सोशल मीडिया
बारामती: बैलगाडी शर्यतीच्या बैलांच्या खरेदीच्या व्यवहारात झालेल्या वादातून गोळीबार झाल्याची घटना बारामती तालुक्यातील निंबूत येथे घडली. या घटनेत बैलाचे पुर्वाश्रमीचे मालक रणजीत निंबाळकर हे गंभीर जखमी झाले आहेत. याप्रकरणी तालुक्यातील वडगा निंबाळकर पोलीस ठाण्यात गुन्हा दाखल करण्यात आला आहे. शहाजी काकडे, गौरव शहाजी काकडे यांच्यासह इतर तिघांविरुद्ध वडगाव निंबाळकर पोलिसांनी गुन्हा दाखल केला आहे.
काही दिवसांपूर्वी निंबूत येथील गौतम काकडे यांनी बैलगाडी शर्यतीतील ट्रिपल महाराष्ट्र केसरी “सुंदर” नावाचा बैल फलटण येथील रणजीत निंबाळकर यांच्याकडून खरेदी केला होता. बैलाचा व्यवहार 37 लाखांचा करून पाच लाख रुपये विसार देऊन खरेदी केला. उर्वरीत रक्कम 32 लाख रुपये घेण्यासाठी निंबाळकर हे काकडे यांच्या घरी गेले असताना, राहिलेल्या पैशाच्या वादातून काकडे यांनी गोळीबार केला. यात रणजीत निंबाळकर गंभीर जखमी झाले असून त्यांना पुण्यातील खासगी रुग्णालयात उपचारासाठी दाखल करण्यात आले आहे. या प्रकरणी निंबाळकर पोलिस ठाण्यात रणजित निंबळकर यांच्या पत्नी अंकिता निंबाळकर यांनी फिर्याद दाखल केली आहे. त्यांच्या फिर्यादीनुसार वडगाव निंबाळकर पोलिस ठाण्यात गौतम शहाजी काकडे, गौरव शहाजी काकडे यांच्यासह इतर तिघांविरुद्ध गुन्हा दाखल केला आहे. अधिक तपास सहाय्यक पोलिस निरीक्षक राहुल घुगे हे करीत आहेत.
