बुधवार, 21 ऑक्टोबर 2026
पंढरपूर : सामान्यांचा असामान्य देव म्हणून पंढरपूरचा विठूरायाची किर्ती सर्वदूर पसरलेली आहे. अनेक भक्त आपापल्या परिने पांडुरंगाची सेवा करत असतात. तर अनेक भाविक विठुरायाला मौल्यवान दागिने व वस्तू अर्पण करत असतात. महाराष्ट्रामध्ये विठूरायांचे अगणित भक्तगण आहेत. त्याचबरोबर इतर राज्यांमध्ये देखील विठ्ठल भक्त भक्तीमध्ये तल्लीन असतात. अशाच एका हैदराबादमधील भक्ताने विठूरायासाठी खास सोन्याचा हार अर्पण केला आहे.
अनेक भक्त विविध पद्धतीने देवाबाबत कृतज्ञता व्यक्त करत असतात. हैद्राबाद येथील एका भाविकाने विठुरायाला सोन्याचा पाच पदरी हार अर्पण केला आहे. विठ्ठल भक्त विजया नायडू यांनी विठुरायाला सोन्याचा पाच पदरी हार अर्पण केला आहे. आकर्षक पद्धतीने बनविलेले हा हार 130 ग्रॅम वजनाचा असून याची किंमत 8 लाख 36 हजार 550 रुपये आहे. विजय नायडू या निस्सीम विठ्ठल भक्त असून पहिल्यांदाच विठ्ठल मंदिरात आल्या आणि त्यांनी देवाला हा पाच पदरी सुवर्ण हार अर्पण केला. यावेळी त्यांच्या सोबत त्यांचे कुटुंबीय होते. मंदिर समितीच्या वतीने नायडू कुटुंबाचा सत्कार करण्यात आला.
विठुरायाला अनोखं दान
विठुराया आणि भक्तांचं असलेल्या अवीट नात्याबद्दल कितीही बोललं तरी कमी ठरणार नाही. विठुरायाचा आशीर्वाद लाभल्यामुळे भरुन पावलेले भक्त सढळ हातांनी आणि खुल्या मनाने दानधर्मही करतात. ते समाजकार्यात स्वत:ला झोकून देतात. किंवा काही भक्त गुप्त दान करुन विठुरायाच्याप्रती कृतज्ञता व्यक्त करतात. आज देखील पंढरपुरात अशाच एका भक्ताने विठुरायाला अनोखं दान केलं आहे
