बुधवार, 21 ऑक्टोबर 2026
मुंबई पालिका, बेस्ट कर्मचाऱ्यांची दिवाळी झाली मुख्यमंत्र्यांमुळे गोड
महाराष्ट्रात आचारसंहिता लागू होण्यापूर्वी मुख्यमंत्री एकनाथ शिंदे यांनी आणखी एक मोठा निर्णय घेतला आहे. मुंबई महापालिकेच्या कर्मचाऱ्यांना दिवाळीत 28 हजार रुपयांचा बोनस देण्याचा निर्णय घेतला आहे.
निवडणूक आयोगाने महाराष्ट्रात विधानसभा निवडणुका जाहीर केल्याच्या काही मिनिटांपूर्वी मुख्यमंत्री एकनाथ शिंदे यांनी महापालिकांच्या सरकारी कर्मचाऱ्यांना दिवाळी बोनस जाहीर केला. त्यांनी बीएमसी (बृहन्मुंबई महानगरपालिका) कर्मचाऱ्यांना 28 हजार रुपयांचा बोनसही जाहीर केला आहे. गेल्या वर्षीच्या तुलनेत ही रक्कम तीन हजार रुपये अधिक आहे. बालवाडी शिक्षक आणि आशा वर्कर्स यांनाही बोनस मिळणार आहे.
काही दिवसांपूर्वी राज्यसभा खासदार रामदास आठवले यांच्या नेतृत्वाखालील म्युनिसिपल लेबर युनियनने बीएमसी कर्मचाऱ्यांना 40,000 रुपयांचा दिवाळी बोनस देण्याची मागणी केली होती. कर्मचाऱ्यांना एक्स-ग्रॅशिया बोनस देण्याची विनंती युनियनने मुख्यमंत्री, उपमुख्यमंत्री आणि महापालिका आयुक्तांकडे केली होती. गेल्या वर्षी महाराष्ट्राचे मुख्यमंत्री एकनाथ शिंदे यांनी 8 नोव्हेंबर रोजी बीएमसी कर्मचाऱ्यांना 26,000 रुपयांचा दिवाळी बोनस जाहीर केला होता.
दरम्यान, भारत निवडणूक आयोगाने मंगळवारी महाराष्ट्र निवडणुकीच्या तारखा जाहीर केल्या. मुख्य निवडणूक आयुक्त राजीव कुमार यांनी सांगितले की, महाराष्ट्रात 288 विधानसभा जागांसाठी 20 नोव्हेंबरला एकाच टप्प्यात मतदान होणार असून 23 नोव्हेंबरला निकाल जाहीर केला जाईल. त्याचवेळी काँग्रेस खासदाराच्या अकाली निधनानंतर रिक्त झालेल्या नांदेड लोकसभा जागेवरील पोटनिवडणुकीसाठी २० नोव्हेंबरला मतदान होणार असून विधानसभा निवडणुकीसह २३ नोव्हेंबरला निकाल जाहीर होणार आहे.
