बुधवार, 21 ऑक्टोबर 2026
फोटो सौजन्य- सोशल मीडिया
सध्या राज्यात सर्व पक्षांकडून जोरदार प्रचार सुरु आहे. अजून प्रचाराचे 8 दिवस शिल्लक आहेत. महाराष्ट्र विधानसभा निवडणूकीसाठी येत्या 20 नोव्हेंबर 2024 मतदान पार पडणार आहे. या विधानसभा निवडणुकीमध्ये मतदानाचा टक्का वाढावा व मतदानापासून कोणीही नागरिक वंचित राहू नये, यासाठी लोकसभा 2024 निवडणुकीप्रमाणेच विधानसभा निवडणुकीतही 85 वर्षांवरील नागरिक आणि दिव्यांग नागरिक जे मतदान केंद्रापर्यत पोहोचू शकत नाही अशा मतदारांसाठी घरुनच मतदान करण्याची सोय उपलब्ध करुन देण्यात आली आहे. यासंबंधी ठाणे जिल्ह्यातील 18 विधानसभा मतदारसंघातून गृहमतदानासाठी एकूण 933 जणांनी नोंदणी केली आहे. त्यापैकी दि.8 आणि आज 9 नोव्हेंबर 2024 या दोन दिवसात 85 वर्षांवरील ज्येष्ठ नागरिक व दिव्यांग मतदार मिळून एकूण 202 मतदारांनी गृहमतदानाचा हक्क बजावला आहे.
गृहमतदानास काल 8 नोव्हेंबर पासून सुरुवात
गृहमतदानास शुक्रवार दि.8 नोव्हेंबर 2024 पासून सुरूवात झाली आहे येत्या 17 नोव्हेंबरपर्यत हे मतदान प्रत्येक विधानसभा मतदारसंघात जिल्हा निवडणूक निर्णय अधिकारी यांनी नेमून दिलेल्या तारखांदिवशी त्या त्या मतदारसंघातील निवडणूक निर्णय अधिकाऱ्यांच्या मार्गदर्शनाखाली होणार आहे. 40 टक्के अंपगत्व असलेले नागरिक आणि 85 वर्षांवरील वृद्ध यांच्याकरिता भारत निवडणूक आयोगामार्फत 12 डी नमुना भरून घरूनच मतदान करण्याची सुविधा उपलब्ध करून दिली जात आहे. ज्या इच्छुक मतदारांनी विधानसभा निवडणुक 2024 ची अधिसूचना जाहीर झाल्यानंतर मतदान केंद्रस्तरीय अधिकारी यांच्याकडे 12 डी फॉर्म भरून दिले होते त्यांनाच या गृहमतदानाचा लाभ घेता येणार आहे.
ठाणे जिल्ह्यात 18 विधानसभा मतदारसंघ आहेत. त्यातील 147 कोपरी पाचपाखाडी विधानसभा आणि 143 डोंबिवली विधानसभा शुक्रवार, दि.8 नोव्हेंबर 2024 रोजी गृहमतदान पार पडले. या दोन्ही विधानसभा मतदारसंघातून 85 वर्षांवरील एकूण 77 ज्येष्ठ मतदारांनी तर 6 दिव्यांग मतदारांनी मतदानाचा हक्क बजावला आहे.
शुक्रवार दि. 8 नोव्हेंबर 2024 रोजी झालेल्या गृहमतदानाची जारी केलेली आकडेवारी-
143 डोंबिवली विधानसभा मतदारसंघ: 85 वर्षावरील ज्येष्ठ नागरिक – 42, दिव्यांग व्यक्ती – 01
147 कोपरी पाचपाखाडी विधानसभा मतदारसंघ: 85 वर्षावरील ज्येष्ठ नागरिक – 35, दिव्यांग व्यक्ती – 05
आज शनिवार, दि.9 नोव्हेंबर 2024 रोजी 143 डोंबिवली विधानसभा मतदारसंघ, 146 ओवळा माजिवडा विधानसभा मतदारसंघ व 149 कळवा मुंब्रा विधानसभा मतदारसंघात गृहमतदान पार पडले. या गृहमतदानात तिन्ही विधानसभा मतदारसंघातून एकूण 85 वर्षांवरील एकूण 89 ज्येष्ठ मतदारांनी तर 30 दिव्यांग मतदारांनी मतदानाचा हक्क बजावला.
9 नोव्हेंबर 2024 रोजी झालेल्या गृहमतदानाची आकडेवारी-
143 डोंबिवली विधानसभा मतदारसंघ: 85 वर्षावरील ज्येष्ठ नागरिक – 36, दिव्यांग व्यक्ती – 01
146 ओवळा माजिवडा विधानसभा मतदारसंघ: 85 वर्षावरील ज्येष्ठ नागरिक – 43, दिव्यांग व्यक्ती – 18
149 कळवा मुंब्रा विधानसभा मतदारसंघ: 85 वर्षावरील ज्येष्ठ नागरिक – 10, दिव्यांग व्यक्ती – 11
येत्या काळात टप्प्याटप्प्याने मतदान जिल्ह्यात घेतले जाणार आहे. तसेच राज्यभरातही हे मतदान घेण्यात येत आहे.
हे देखील वाचा- कल्याण पश्चिमेत वाहतूक कोंडी सोडण्यासाठी सचिन बारसेंना निवडून द्या ! शिवसेना उपनेत्या सुषमा अंधारेंचे आवाहन
