बुधवार, 21 ऑक्टोबर 2026
फोटो सौजन्य- pinterest
नवी मुंबईतील तुर्भे येथील प्रस्तावित एकात्मिक घनकचरा व्यवस्थापन प्रकल्पाबाबत विविध दावे आणि गैरसमज पसरत असल्याचे नवी मुंबई महानगरपालिकेने म्हटले आहे. प्रकल्पामुळे नागरिकांच्या आरोग्याला विषारी वायूमुळे गंभीर धोका निर्माण होईल, हा दावा चुकीचा असल्याचे NMMCने स्पष्ट केले आहे.
नवी मुंबई महानगरपालिकेच्या तुर्भे येथील प्रस्तावित एकात्मिक घनकचरा व्यवस्थापन प्रकल्पात त्रुटी असल्याबाबत तसेच निविदा प्रक्रियेत अनियमितता झाल्याबाबत चुकीची माहिती प्रसारित होताना निदर्शनास येत आहे. त्या अनुंषगाने सदर प्रकल्पाबाबत विसंगत व विपर्यास्त माहिती प्रसारित होऊ नये यादृष्टीने नवी मुंबई महानगरपालिकेने सदर प्रकल्पाबाबत वस्तुस्थिती सादर केली आहे. या प्रकल्पातील विषारी वायुमुळे नागरिकांच्या आरोग्याला गंभीर धोका असल्याचे म्हणणे मांडण्यात आले आहे. हा निष्कर्ष अत्यंत चुकीचा असून वास्तविकतः नव्याने लागू झालेला घनकचरा व्यवस्थापन नियम २०२६ अन्वये तसेच केंद्रीय प्रदूषण नियंत्रण मंडळाच्या नियमांनुसार असे प्रकल्प राबविणे स्थानिक स्वराज्य संस्थांसाठी अनिवार्य आहे.
नवी मुंबई महानगरपालिका परिसरामध्ये १५०० मॅट्रिक टन घनकचऱ्यावर आधुनिक पद्धतीचे वर्गीकरण करून त्यापासून निर्माण होणाऱ्या ६०० टन आरडीएफमधून २७ मेगावॅट प्रतिदिन इतकी विद्युत निर्मिती करणे व ४५० मॅट्रिक टन घनकचऱ्यावर प्रोसेस करून त्यापासून नैसर्गिक गॅसची निर्मिती करणे तसेच बायोचार फॅसिलिटी व त्यामध्ये अत्याधुनिक पद्धतीचे लिचेट ट्रीटमेंट प्लांट व स्लज ड्रॉइंग फॅसिलिटी उभारणे या बाबींचा समावेश आहे.
हा प्रकल्प सार्वजनिक-खाजगी भागीदारी पद्धती अंतर्गत डिझाइन, बिल्ड, फायनान्स, ऑपरेट आणि ट्रान्सफर प्रकल्प म्हणून संरचित करण्यात आला आहे. ही निविदा दस्तऐवज आणि बोली प्रक्रिया व्यवस्थापनाची तपासणी आयआयटी, नीरी आणि पीपीपीमधील तज्ज्ञ तसेच मित्रामधील पायाभूत सुविधा तज्ज्ञांचा समावेश असलेल्या स्वतंत्र तांत्रिक सल्लागार समितीद्वारे करण्यात आली आहे. भारत सरकार आणि महाराष्ट्र सरकारच्या पॅनेलवरील व्यवहार सल्लागारांच्या सहाय्याने पार पाडण्यात आली आहे. निविदा प्रस्तावात नमूद केलेल्या पात्रता आणि अर्हता निकषांनुसार निविदाकाराने सादर केलेल्या तांत्रिक अनुभवाची रितसर तपासणी आणि मूल्यांकन करण्यात आले आहे. यामध्ये तांत्रिक मूल्यांकन समितीने निविदाकाराने सादर केलेल्या कागदपत्रांचा अनुभवाच्या विचार केला आहे.
(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)
