शनिवार, 22 ऑगस्ट 2026
(Representative Image - Photo Credit - Social Media)
वर्धा तहसील कार्यालयातील धान्य पुरवठा विभागात समोर आलेल्या 31.77 लाख रुपयांच्या कथित स्वस्त धान्य घोटाळा प्रकरणाने आता गंभीर वळण घेतले आहे. या प्रकरणी निलंबित तालुका पुरवठा निरीक्षण अधिकारी मनीषा माजरखेडे आणि स्वस्त धान्य दुकानदार योगेश भोले यांच्याविरुद्ध शहर पोलीस ठाण्यात गुन्हा दाखल करण्यात आला आहे.
यापूर्वी या प्रकरणाची कार्यालयीन चौकशी करण्यात आली होती. चौकशीचा अहवाल जिल्हाधिकाऱ्यांकडे सादर झाल्यानंतर माजरखेडे यांच्यावर निलंबनाची कारवाई करण्यात आली. त्यानंतर प्रकरणाचे गांभीर्य लक्षात घेऊन आता फौजदारी कारवाई करण्यात आली आहे.
नायब तहसीलदार अजय धर्माधिकारी यांच्या तक्रारीनुसार, वर्धा जिल्हा सहकारी होलसेल व रिटेल कन्झुमर्स सोसायटीच्या जोड दुकानाशी संबंधित ई-पॉस मशीनवर नियमांचे पालन न करता शिधापत्रिकांची ‘RC Transfer’ करण्यात आली.
तक्रारीनुसार, संबंधित अर्ज उपलब्ध नसतानाही काही शिधापत्रिका नियमबाह्य पद्धतीने दुसऱ्या दुकानाकडे वळती करण्यात आल्या. तहसीलदारांच्या तपासणीत तालुका पुरवठा निरीक्षण अधिकाऱ्यांच्या लॉगिन आयडीचा वापर करून या प्रक्रिया करण्यात आल्याचे आढळल्याचा दावा करण्यात आला आहे.
या प्रकरणात एकूण 619 अर्जांपैकी 337 अर्ज प्राप्त झाल्याचे तक्रारीत नमूद आहे. या अर्जांची पडताळणी करताना संबंधित कार्डधारकांकडून लेखी जबाब घेण्यात आले. यातील काही कार्डधारकांनी आपण शिधापत्रिका वळती करण्यासाठी कोणताही अर्ज केलेला नसल्याचे तसेच संबंधित दुकानातून धान्य उचलले नसल्याचे जबाबात नमूद केल्याचे पोलिसांनी सांगितले.
तक्रारीनुसार, अधिकाऱ्यांच्या लॉगिन आयडीचा कथित गैरवापर करून मोठ्या संख्येने ‘सायलेंट RC’ एकाच दुकानाकडे वळती करण्यात आल्या. त्यानंतर धान्याची उचल झाल्याने शासनाचे आर्थिक नुकसान झाल्याचा आरोप करण्यात आला आहे.
या प्रकरणी नायब तहसीलदारांच्या तक्रारीवरून शहर पोलिसांनी गुन्हा दाखल केला असून, पुढील तपास सुरू आहे. मनीषा माजरखेडे आणि योगेश भोले या दोन्ही आरोपींचा शोध पोलिसांकडून घेतला जात आहे. स्वस्त धान्य वितरण व्यवस्थेत नियमबाह्य पद्धतीने शिधापत्रिका वळती करून शासनाच्या धान्याची उचल करण्यात आल्याचे आरोप असल्याने या प्रकरणातील पुढील तपासाकडे लक्ष लागले आहे.
