शुक्रवार, 23 ऑक्टोबर 2026
Sri Lanka Beat england
ENG vs SL: पाकिस्तानमध्ये सध्या सुरु असलेल्या ट्राय सीरीजमधील तिसऱ्या सामन्यात एका नवीन विक्रमाची नोंद झाली आहे. रावळपिंडी स्टेडियमवर श्रीलंका आणि इंग्लंड यांच्यात सामना खेळला गेला. या सामन्यात प्रथम फलंदाजी करताना , कर्णधार हॅरी ब्रूकच्या २०२ धावांच्या खेळीच्या जोरावर इंग्लंडने ५० षटकांत ४२९ धावा केल्या. लक्ष्याचा पाठलाग करताना श्रीलंकेने ४३० धावांचे मोठे लक्ष्य गाठले आणि इंग्लंडचा २ विकेट्सने पराभव केला. पवन रत्नायकेच्या १३० आणि दसुन शनाकाच्या ९७ धावांनी विजयात महत्त्वाची भूमिका बजावली. एकदिवसीय क्रिकेटच्या इतिहासात कोणत्याही संघाने केलेला हा दुसरा सर्वात मोठा यशस्वी पाठलाग आहे. (Sri Lanka Beat england Chase 430 Runs in ODI)
नाणेफेक गमावून इंग्लंड प्रथम फलंदाजी करण्यासाठी मैदानात उतरला. इंग्लंडने सुरुवातीपासूनच धावांचा वेग कायम ठेवला. टॉम बँटनने संघाला भक्कम ५० धावांचे योगदान दिले, तर जो रूटने ६९ धावांची भर घालून डावाला आधार दिला. दोन्ही फलंदाज बाद झाल्यानंतर कर्णधार हॅरी ब्रुकने सूत्रे हाती घेतली आणि श्रीलंकेच्या गोलंदाजांविरुद्ध आक्रमकपणे धावा केल्या.ब्रुकने २०२ धावांची शानदार खेळी केली. त्याच्या द्विशतकाच्या जोरावर इंग्लंडने ५० षटकांत ४२९/४ अशी मोठी धावसंख्या उभारली.
४३० धावांचे मोठे लक्ष्य गाठताना, अविष्का फर्नांडोच्या खेळीने श्रीलंकेला दमदार सुरुवात करून दिली. तो शतक पूर्ण करण्यापासून केवळ तीन धावा दूर राहिला आणि ९७ धावांवर बाद झाला. त्यानंतर पवन रत्नायकेने सूत्रे हाती घेतली आणि १३० धावांची शानदार खेळी केली. त्याच्या फलंदाजीमुळे श्रीलंका सामना जिंकण्याच्या आशा जिवंत राहिल्या. रत्नायकेनंतर दासुन शनाकानेही महत्त्वपूर्ण योगदान दिले. शतक हुकल्याने ९७ धावा करून तो पॅव्हेलियनमध्ये परतला. मात्र, त्याच्या बाद होण्याने श्रीलंकेच्या अडचणी वाढल्या. संघाला विजयासाठी वेगाने धावा करणे आवश्यक होते आणि विकेट्स सातत्याने पडत होत्या.
सामन्याच्या अंतिम टप्प्यात जनिथ लियानागे श्रीलंकेचा विजयाचा नायक ठरला. त्याने अवघ्या २७ चेंडूंमध्ये नाबाद ६१ धावांची खेळी करून इंग्लंडच्या विजयाच्या आशा धुळीस मिळवल्या. त्याच्या आक्रमक फलंदाजीने सामन्याचे चित्र पालटले. अखेर श्रीलंकेने ४९.५ षटकांत ८ विकेट्स गमावून ४३० धावा करत एक ऐतिहासिक विजय नोंदवला.
