बुधवार, 21 ऑक्टोबर 2026
Bolivia Explosion : बोलिव्हियातील लष्करी तळावर महाभयंकर स्फोट; १० ठार, ६० हून अधिक जखमी अन् घरे उद्ध्वस्त ( फोटो सौजन्य : सोशल मीडिया )
दक्षिण अमेरिकेतील बोलिव्हिया (Bolivia) देशातून एक अत्यंत भीषण बातमी समोर आली आहे. शुक्रवारी (४ सप्टेंबर) स्थानिक वेळेनुसार दुपारी अंदाजे २:३० वाजता वियाचा (Viacha) शहरातील एका लष्करी तळावरील संकुलात भयंकर स्फोट झाला. प्रशासकीय राजधानी ला पाझ (La Paz) पासून अवघ्या ३० किलोमीटर अंतरावर असलेल्या या तळावर स्फोटक आणि फटाक्यांचा साठा (Fireworks Stockpile) ठेवण्यात आला होता, जिथे हा अपघात घडला. या भीषण घटनेत आतापर्यंत किमान १० लोकांचा दुर्दैवी मृत्यू झाला असून ६० हून अधिक जण गंभीर जखमी झाले आहेत.
हा स्फोट इतका तीव्र होता की त्याचा आवाज कित्येक किलोमीटर अंतरापर्यंत ऐकू आला. स्फोट झाल्यानंतर आकाशात धुराचे प्रचंड लोट उसळले, ज्यामुळे स्थानिक रहिवाशांमध्ये अभूतपूर्व घबराट पसरली. या घटनेची माहिती मिळताच रुग्णवाहिका, अग्निशमन दल, वैद्यकीय पथके आणि पोलीस कर्मचारी तातडीने घटनास्थळी दाखल झाले असून संपूर्ण परिसराची नाकेबंदी करण्यात आली आहे.
जागतिक घडामोडी संबंधित बातम्या वाचण्यासाठी येथे क्लिक करा : Nepal Flood: नेपाळमधील पुरात सुमारे 600 शाळकरी मुले बेपत्ता, मृतांचा आकडा 1,282 वर पोहोचला; लष्कराकडून शोधमोहीम सुरू
बोलिव्हियाचे संरक्षण मंत्री अर्नेस्टो जस्टिनियानो (Ernesto Justiniano) यांनी दिलेल्या अधिकृत माहितीनुसार, या अपघातात जखमी झालेल्यांमध्ये बहुतांश स्थानिक नागरिक आहेत, तर उर्वरित काही लष्करी जवान आहेत. वियाचा शहराच्या आरोग्य संचालक रीटा नेब्रास्का (Rita Nebraska) यांनी सांगितले की, घटनेत सुमारे ६२ लोक जखमी झाले आहेत. त्यापैकी १४ गंभीर जखमींना तातडीने ला पाझ येथील उच्चस्तरीय रुग्णालयात उपचारासाठी हलवण्यात आले आहे. जखमींमध्ये एका लहान बालकाचाही समावेश असून, ते बालक तब्बल ९० टक्के भाजले असल्याची अतिशय धक्कादायक माहिती समोर आली आहे.
स्फोटाच्या धक्क्यामुळे (Blast Wave) आजूबाजूच्या निवासी परिसरातील अनेक घरांचे मोठे नुकसान झाले आहे. कित्येक घरांच्या खिडक्यांच्या काचा फुटून तुकडे सर्वत्र पसरले. यामुळे घरात असलेल्या अनेक नागरिकांना काचा लागून दुखापत झाली.
जागतिक घडामोडी संबंधित बातम्या वाचण्यासाठी येथे क्लिक करा : Nepal Flood : त्रिशुली-3A जलविद्युत बोगद्यात 9 दिवसांनंतर चमत्कार, 2 कामगारांची जिवंत सुटका, पहा VIDEO
अग्निशमन दलाच्या पथकाने लष्करी संकुलात पाहणी केली असता, स्फोटाच्या ठिकाणी अजूनही एक तीव्र ‘उष्णतेचा स्रोत’ (Heat Source) सक्रिय असल्याचे निष्पन्न झाले. यामुळे तळावर साठवून ठेवलेल्या उर्वरित स्फोटकांमध्ये पुन्हा दुसरा स्फोट होण्याचा मोठा धोका निर्माण झाला आहे. ही आणीबाणीची परिस्थिती लक्षात घेऊन आरोग्य आणि पोलीस प्रशासनाने घटनास्थळाभोवती सुरक्षा कडे उभारले असून सर्व नागरिकांना या भागापासून किमान १५० मीटर अंतर राखण्याचे सक्त निर्देश दिले आहेत.
बोलिव्हिया सरकार आणि लष्कराने या स्फोटाच्या मूळ कारणांची उच्चस्तरीय चौकशी सुरू केली आहे. संरक्षण मंत्रालयाच्या फटाक्यांच्या साठ्यामध्ये अचानक आग कशी लागली, हे अद्याप अस्पष्ट असून सुरक्षा नियमांचे उल्लंघन झाले होते का, याचा शोध तपास यंत्रणा घेत आहेत. सुमारे १,००,००० लोकसंख्या असलेल्या वियाचा शहरात या दुर्घटनेमुळे प्रचंड शोक आणि भीतीचे वातावरण पसरले आहे.
