सोमवार, 12 ऑक्टोबर 2026
Pakistan civil war: ४०,००० पंजाब पोलिसांचे बंड! मुनीर अन् शहबाज यांच्याविरोधात पोलीस दलात संतापाचा भडका ( फोटो सौजन्य : सोशल मीडिया )
पाकिस्तानचे (Pakistan civil war) राजकीय वातावरण सध्या अत्यंत स्फोटक आणि अनिश्चित वळणावर येऊन पोहोचले आहे. माजी पंतप्रधान इम्रान खान यांना राजकीयदृष्ट्या पूर्णपणे उद्ध्वस्त करण्यासाठी आणि त्यांचा बालेकिल्ला उद्ध्वस्त करण्यासाठी पाकिस्तानचे लष्करप्रमुख जनरल असिम मुनीर आणि पंतप्रधान शहबाज शरीफ यांनी अत्यंत कठोर पावले उचलण्यास सुरुवात केली आहे. मात्र, रावळपिंडीतील लष्करी मुख्यालयातून आखण्यात आलेला हा मास्टरप्लॅन आता स्वतःच सरकारच्या अंगलट येताना दिसत आहे. इम्रान खान यांच्या पाकिस्तान तहरीक-ए-इन्साफ (PTI) पक्षाचे एकमेव प्रांतीय सरकार असलेल्या खैबर पख्तुनख्वा प्रांतात सरकार निलंबित करून ४०,००० पंजाब पोलिसांना तैनात करण्याचा निर्णय घेण्यात आला होता. परंतु, ज्या पोलिसांच्या जीवावर सरकार ही दडपशाही करू पाहत होते, त्याच पंजाब पोलिसांनी वरिष्ठांचे आदेश मानण्यास उघडपणे नकार देत बंडाचे निशाण उभारले आहे.
या राजकीय नाट्याची सुरुवात तेव्हा झाली जेव्हा खैबर पख्तुनख्वा प्रांताचे प्रमुख सोहेल आफ्रिदी यांनी इम्रान खान यांना रावळपिंडीतील अदियाला तुरुंगातून सोडवण्यासाठी संपूर्ण देशभरातून लाखो समर्थकांचा भव्य मोर्चा काढण्याची घोषणा केली. या मोर्चाची धसका घेत लष्करप्रमुख असिम मुनीर यांच्या थेट दबावाखाली प्रांतीय सरकार तडकाफडकी निलंबित करण्यात आले. इतकेच नाही तर सोहेल आफ्रिदी यांच्यासह अनेक महत्त्वाच्या प्रांतीय नेत्यांना रात्रीतून अटक करून अनिश्चित काळासाठी तुरुंगात डांबण्यात आले. इम्रान खान यांची जनमानसातील लोकप्रियता आणि त्यांच्या पक्षाची संघटनात्मक ताकद यामुळे घाबरलेल्या शहबाज-मुनीर जोडगोळीने खैबर प्रांतावर लष्करी छावणीसारखे नियंत्रण मिळवण्याचा प्रयत्न केला.
जागतिक घडामोडी संबंधित बातम्या वाचण्यासाठी येथे क्लिक करा : Global Protests: केवळ भारतातच नव्हे तर ‘या’ 7 देशांमध्येही पेटलेला आहे आंदोलनांचा वणवा; 3 देशांमध्ये पंतप्रधानांचे सिंहासन धोक्यात
२०२४ मध्ये पाकिस्तानात पार पडलेल्या सार्वत्रिक निवडणुकीत लष्कराची संपूर्ण यंत्रणा आणि शहबाज शरीफ यांची मुस्लिम लीग (PML-N) एकत्र येऊनही खैबर पख्तुनख्वा प्रांतात इम्रान खान यांच्या लाटेसमोर ते निष्प्रभ ठरले होते. हा एकमेव असा प्रांत होता जिथे सर्व अडथळे पार करत पीटीआयने स्वतःचे सरकार स्थापन केले. शहबाज शरीफ आणि लष्करप्रमुखांना भीती आहे की, खैबर प्रांताचे स्थानिक पोलीस अधिकारी आणि प्रशासन हे इम्रान खान यांच्याशी निष्ठावान आहेत. त्यामुळे ते इम्रान खान समर्थकांवर कोणतीही कडक कारवाई किंवा गोळीबार करणार नाहीत.
याच कारणामुळे, जिथे शहबाज शरीफ यांची भाची मरियम नवाज मुख्यमंत्री म्हणून सत्तेत आहे, त्या पंजाब प्रांतातून तब्बल ४०,००० पोलिसांचे लष्करी तुकडीसारखे ताफे खैबरमध्ये पाठवण्याची योजना आखण्यात आली. पंजाब पोलिसांना इम्रान खान समर्थकांचे आंदोलन दडपण्यासाठी आणि विरोधकांना शांत करण्यासाठी हत्यार म्हणून वापरण्याचा सरकारचा डाव होता. परंतु, शहबाज आणि मरियम नवाज यांचा हा डाव पंजाब पोलिसांच्या अंतर्गत संतापामुळे सपशेल अपयशी ठरताना दिसत आहे.
रावळपिंडी आणि लाहोरमधील वरिष्ठ सूत्रांनी दिलेल्या माहितीनुसार, पंजाब पोलिसांमध्ये ही बंडखोरी एका रात्रीत निर्माण झालेली नाही. यापूर्वी इम्रान खान यांच्या पीटीआय समर्थकांचा निषेध आणि निदर्शने नियंत्रणात आणण्यासाठी ज्या पोलीस कर्मचाऱ्यांना विविध सीमावर्ती भागांत तैनात करण्यात आले होते, त्यांना अत्यंत अमानुष परिस्थितीचा सामना करावा लागला. कडक उन्हात आणि दुर्गम भागात सीमेवर तैनात असलेल्या या पोलिसांना राहण्यासाठी योग्य निवारा देण्यात आला नाही आणि पिण्याचे स्वच्छ पाणीही उपलब्ध करून दिले गेले नाही.
सर्वात धक्कादायक बाब म्हणजे, या पोलीस कर्मचाऱ्यांना शिळे आणि खराब झालेले अन्न खाण्यास भाग पाडण्यात आले. या निकृष्ट अन्नसेवनामुळे अन्नातून विषबाधा होऊन आणि वेळेवर वैद्यकीय उपचार न मिळाल्याने पंजाब पोलिसांतील तब्बल पाच पोलीस कर्मचाऱ्यांचा दुर्दैवी मृत्यू झाला. आपल्याच सहकाऱ्यांचा अशा प्रकारे झालेला अमानुष अंत पाहून पोलीस दलात प्रचंड संतापाची लहर पसरली. जेव्हा त्यांना आता पुन्हा एकदा खैबरच्या दुर्गम आणि धोकादायक भागात ४०,००० पोलिसांच्या तुकडीत पाठवण्याचे आदेश आले, तेव्हा खालच्या स्तरातील कर्मचाऱ्यांनी आणि अधिकाऱ्यांनी स्पष्टपणे सांगितले की, “जे सरकार आमच्या प्राणाची आणि आरोग्याची साधी पर्वा करत नाही, त्या सरकारच्या राजकीय स्वार्थासाठी आम्ही सैनिकांसारखे बळी पडणार नाही.”
जागतिक घडामोडी संबंधित बातम्या वाचण्यासाठी येथे क्लिक करा : Pakistan Emergency: पाकिस्तानच्या खैबर पख्तुनख्वामध्ये आणीबाणीनंतर गव्हर्नर हाऊस पेटवले; पोलिसांचा थेट गोळीबार, स्थिती हाताबाहेर
पाकिस्तानच्या ‘डॉन’ या नामांकित वृत्तपत्राने प्रसिद्ध केलेल्या वृत्तानुसार, पंजाब पोलीस कर्मचाऱ्यांनी वरिष्ठ मुख्यालयातून येणारे कोणतेही नवे तैनात आदेश मानण्यास उघडपणे असमर्थता दर्शवली आहे. पोलिसांचे म्हणणे आहे की, प्रांतीय किंवा केंद्र सरकार आपल्या राजकीय फायद्यासाठी पोलीस दलाचा वापर सैन्यासारखा करत आहे आणि त्यांना जनतेच्या विरोधात उभे करत आहे. एका बाजूला खैबरमधील जनता इम्रान खान यांच्या पाठीशी भक्कमपणे उभी आहे, तर दुसऱ्या बाजूला पंजाब पोलिसांना तिथे पाठवून दोन प्रांतांमध्ये थेट संघर्ष पेटवण्याचा प्रयत्न केला जात आहे.
पंजाब पोलिसांच्या महासंचालकांनी (IGP) प्रसारमाध्यमांशी बोलताना परिस्थिती सावरून घेण्याचा प्रयत्न केला. ४०,००० पोलिसांच्या तैनातीचा अंतिम निर्णय अद्याप औपचारिकपणे झालेला नाही आणि जेव्हा असा कोणताही निर्णय घेतला जाईल, तेव्हा पोलीस दलाच्या सर्व मागण्यांचा व सुरक्षिततेचा गांभीर्याने विचार केला जाईल, असे स्पष्टीकरण देऊन त्यांनी तणाव कमी करण्याचा प्रयत्न केला. मात्र, रावळपिंडीतील लष्करी मुख्यालयात या बंडखोरीमुळे मोठी अस्वस्थता पसरली आहे. जर कायदा व सुव्यवस्था राखणारी यंत्रणाच आदेश मानण्यास नकार देऊ लागली, तर येणाऱ्या काळात पाकिस्तानमधील नागरी युद्धसदृश परिस्थिती रोखणे लष्करप्रमुख असिम मुनीर यांच्यासाठी अशक्यप्राय होऊन बसेल.0
