मंगळवार, 20 ऑक्टोबर 2026
जपानच्या टोकारा बेटांवर भीतीचं सावट! दोन आठवड्यांत १००० हून अधिक भूकंप, ५ जुलैच्या भविष्यवाणीने खळबळ ( फोटो सौजन्य : सोशल मीडिया)
July 5 prophecy Japan quake : जपानमधील शांत समजल्या जाणाऱ्या टोकारा बेटांवर गेल्या दोन आठवड्यांपासून भूकंपांच्या मालिकेने खळबळ माजवली आहे. २१ जूनपासून १००० हून अधिक भूकंपांची नोंद झाली असून, त्यामुळे या बेटांवरील सुमारे ७०० नागरिकांमध्ये भीतीचं वातावरण निर्माण झालं आहे. यामुळे काहीजण झोपूही शकत नाहीत, तर काहींनी स्थलांतराच्या तयारीला सुरुवात केली आहे.
जरी या भूकंपांपैकी बहुतांश कमी ते मध्यम तीव्रतेचे असले, तरी संख्येतील वाढ आणि वारंवारता पाहता, मोठ्या आपत्तीची शक्यता नाकारता येत नाही, असा इशारा जपानी भूकंपशास्त्रज्ञांनी दिला आहे. विशेष म्हणजे, यामुळे ‘जपानचे बाबा वेंगा’ म्हणून ओळखल्या जाणाऱ्या रिओ तात्सुकी यांच्या ५ जुलैच्या भीषण आपत्तीच्या भाकितावर नव्याने चर्चा सुरू झाली आहे.
टोकारा ही सात लहान बेटांची साखळी आहे जी क्युशूच्या दक्षिणेला पॅसिफिक महासागरात रिंग ऑफ फायर या अतिशय अस्थिर भूकंपीय क्षेत्रात वसलेली आहे. ही बेटे अनेक टेक्टोनिक प्लेट्सच्या संधिस्थळी असल्यामुळे येथे भूकंप नवीन नाहीत. पण या प्रमाणात आणि इतक्या वेगाने भूकंप होणे अत्यंत दुर्मीळ व धोकादायक मानले जाते. जपान हवामान संस्थेनुसार, २१ जूनपासून सुरू झालेल्या भूकंपीय हालचाली २३ जून रोजी एका दिवसात तब्बल १८३ भूकंपांपर्यंत पोहोचल्या. त्यापैकी अनेक शिंदो स्केलवर कमी तीव्रतेचे होते, परंतु काही भूकंप शिंदो ६ पर्यंत पोहोचले, जेव्हा लोकांना उभे राहणेही कठीण होते.
जागतिक घडामोडी संबंधित बातम्या वाचण्यासाठी येथे क्लिक करा : रशियाचा तालिबानला खंबीर पाठिंबा! पुतिन यांच्या मास्टरस्ट्रोकमुळे पाकिस्तानचेही मोठे नुकसान
टोकारा बेटांवर राहणाऱ्या लोकांना दिवस-रात्र या भूकंपांचे धक्के बसत असल्यामुळे मानसिक तणाव मोठ्या प्रमाणावर वाढला आहे. शाळा व घरांमध्ये थरथरण्याचे प्रकार दर तासाला अनुभवले जात आहेत. काही क्षणी भूकंपाची तीव्रता इतकी वाढली की अकुसेकी बेटावर तात्पुरते स्थलांतराचे आदेशही देण्यात आले होते. हे आदेश नंतर मागे घेतले गेले, मात्र अधिकाऱ्यांनी नागरिकांना आश्रयस्थानी जाण्यास आणि आपत्कालीन तयारी ठेवण्याचे आवाहन केले आहे.
जपानने १९९५ साली कोबे भूकंपाचा मोठा धक्का सोसला होता. सध्याच्या परिस्थितीची तुलना त्याच्याशी केली जात आहे, कारण यंदा झालेली हालचाल तीव्रतेच्या बाबतीत त्यानंतरची सर्वात मोठी मानली जात आहे. शास्त्रज्ञांचा अंदाज आहे की हे खालच्या समुद्रातील दोष रेषा व जटिल भूगर्भीय संरचनेत वाढणाऱ्या दाबाचे परिणाम असू शकतात.
भूकंपांमुळे अनेक नागरिकांमध्ये भविष्यातील संकटांबाबत अनिश्चितता वाढली आहे. विशेषतः जपानमधील एक चर्चित भविष्यवक्ता रिओ तात्सुकी यांनी ५ जुलैला एक भीषण नैसर्गिक आपत्ती होण्याची शक्यता वर्तवली होती, ज्याने नागरिकांमध्ये अजूनच भीती पसरवली आहे.
जपान सरकारच्या आणि भूगर्भशास्त्रज्ञांच्या मते, पुढील ३० वर्षांत जपानमध्ये मोठा विनाशकारी भूकंप होण्याची शक्यता ७५-८२% आहे. त्यामुळे टोकारा बेटांवरील ही भूकंपीय मालिका एखाद्या मोठ्या संकटाची नांदी ठरू शकते, अशी भीती व्यक्त होत आहे.
जागतिक घडामोडी संबंधित बातम्या वाचण्यासाठी येथे क्लिक करा : भूकंपाचे 13 धक्के, 10 स्फोट… रशियाने युक्रेनची राजधानी कीववर अचानक डागले विनाशकारी क्षेपणास्त्र
सध्या या बेटांवरील नागरिक भीती, तणाव आणि सतर्कतेत जीवन जगत आहेत. शास्त्रज्ञ व आपत्कालीन यंत्रणा परिस्थितीवर लक्ष ठेवून आहेत, मात्र सततच्या भूकंपांमुळे मोठ्या आपत्तीची शक्यता नाकारता येत नाही. अशा वेळी प्रशासनाने योग्य उपाययोजना करून रहिवाशांच्या सुरक्षिततेची हमी देणे अत्यंत गरजेचे ठरत आहे.
