बाईक मेंटेनन्ससाठी फॉलो करा ‘या’ 5 टिप्स, होईल पैश्याची बचत आणि मायलेजही वाढेल

आपल्या बाईकची काळजी घेणं खूप गरजेचं असते. जर आपण बाईकची योग्य काळजी घेतली नाही तर आपल्याला अनेक समस्यांना सामोरे जावे लागते. याचा बाईकच्या परफॉर्मन्स आणि मायलेजवरही परिणाम होतो. त्यामुळेच बाईक मेंटेनन्सदरम्यान या 5 टिप्सबद्दल माहित असणे गरजेचे आहे.

आपली स्वतःची बाईक घेणे हे प्रत्येक तरुणाचे स्वप्न असते. पण जेव्हा हे स्वप्न पूर्ण होतं तेव्हा आपल्याला समजते की बाके विकत घेण्यापेक्षा तिला मेंटेन करणे फार कठीण असते. बाईक नवीन असताना एवढी समस्या येत नाही पण नंतर ती जुनी झाल्यावर अनेक समस्या उद्भवू लागतात. खरंतर आजच्या युगात बाईक आपली गरज बनली आहे. यामुळेच कित्येक जण बाईक घेऊन तर बसतात पण तिला हवे तसे मेंटेन करत नाही. ज्यामुळे बाईक लवकर खराब होते. यामुळेच तुम्ही तुमची बाईक मेंटेन कशी करावी याबद्दल जाणून घेणे महत्वाचे आहे.

चेन लुब्रिकेशन

बाईकची चेन नियमितपणे तपासत रहा. बाईक जसजशी जुनी होत जाते तसतसे तिच्या चेन सेटमधून आवाज येऊ लागतो. त्यामुळे चेन गंजून खराब होण्याचा धोका असतो. त्याचबरोबर बाईक सतत चालत राहिल्याने चेनही सैल होऊ शकते. अशा परिस्थितीत जर तुम्ही बाईक चिखलात चालवणार असाल तर ती चालवून झाल्यावर त्याची साखळी साफ करून ठेवा.

हे देखील वाचा: स्टयलिश लूक असणारी बाईक शोधताय? Yamaha कडून नवीन एडिशन मध्ये R15 आणि MT-15 लाँच

ब्रेक आणि क्लच

ब्रेक आणि क्लच हे बाईकचे अतिशय महत्त्वाचे भाग आहेत. सतत वापराने ते सैल होतात. जेव्हा तुमच्या बाईकमधील ब्रेक आवाज करू लागतात किंवा क्लच पूर्णपणे सोडल्यानंतर बाईक वेग पकडण्यासाठी खूप वेळ घेत असेल तर तेव्हा लगेच तुमच्या मेकॅनिकशी संपर्क साधा.

इंजिन

बाईकचे इंजिन ऑइल नियमितपणे तपासत चला. खूप जुने ऑइल इंजिनचे अन्य पार्टस खराब करू शकते. यामुळे तुमच्या बाईक सर्व्हिसिंगचा खर्चही वाढेल. जर तुम्ही तुमची बाईक खूप वापरात असाल तर तिची योग्य वेळी सर्व्हिस करून घ्या आणि इंजिन ऑइल देखील बदलून घ्या. खराब इंजिन ऑइलमुळे बाईकच्या मायलेज वरही परिणाम होतो.

एअर फिल्टर आणि टायर

बाईकमध्ये एअर फिल्टर असते, ज्याच्या मदतीने इंजिन सुरळीतपणे काम करते. नियमित बाईक चालवल्यामुळे त्यात माती साचू शकते. अशा परिस्थितीत आपण त्याची नियमित स्वच्छता करत राहायला हवी. तुम्ही बाईक सर्व्हिसिंगच्या वेळी एअर फिल्टर बदलू शकता. याशिवाय बाईकच्या टायरमध्ये पुरेशी हवा भरून घ्या. कमी आणि जास्त हवेचा दाब बाईकच्या मायलेजवर परिणाम करतो.

स्पार्क प्लग

बाईकच्या स्पार्क प्लगमुळे होणाऱ्या समस्यांकडे लोकं जास्त लक्ष देताना दिसत नाही. या कारणामुळे अनेकवेळा बाईक नीट सुरू होत नाही. त्यामुळे, 1500-2000 किलोमीटर बाईक चालली की तिचे स्पार्क प्लग बदलणे महत्त्वाचे असते. तसेच, वेळोवेळी, आपण स्वत: ते उघडू शकता, कापडाने स्वच्छ करू शकता आणि बाइकमध्ये परत फिट करू शकता.