‘गोकुळ’च्या दूध दरात वाढ; वाचा… आता एक लिटरसाठी किती रुपये मोजावे लागणार!

राज्यातील आघाडीचा दूध संघ असलेल्या गोकुळकडून गाईच्या दूध दरात प्रतिलिटर मागे २ रुपयांनी वाढ करण्यात आली आहे. मागील महिन्याच्या सुरुवातीला मदर, अमूल आणि पराग डेअरीकडून गाईच्या दूध दरात वाढ करण्याचा निर्णय घेण्यात आला होता. त्यानंतर आता गोकुळ देखील दूध दरात वाढ करण्याचा निर्णय घेतला आहे.

महागाईने आधीच सर्वसामान्य नागरिकांचे कंबरडे मोडले असून, आता सर्वसामान्यांच्या खिशाला कात्री लावणारी बातमी समोर आली आहे. राज्यातील प्रमुख दूध उत्पादक संघ असलेल्या कोल्हापूर जिल्हा दूध उत्पादक संघ अर्थात गोकुळ दूध संघाने गाईच्या दुधाच्या दरात वाढ करण्याचा निर्णय घेतला आहे. ज्यानुसार आता गाईच्या दुध दरात प्रति लिटरमागे २ रुपयांनी वाढ करण्यात आली आहे. विशेष म्हणजे ही दरवाढ तात्काळ लागू करण्यात आली आहे. ज्यामुळे आता राज्यातील शेतकऱ्यांना काहीसा मिळणार आहे. तर ग्राहकांना मात्र, याचा मोठा भुर्दंड सहन करावा लागणार आहे.

काय आहे नवीन दूध दर?

सध्याच्या घडीला राज्यभरात गोकुळचे गाईचे दुध हे ५४ रुपये प्रति लिटर दराने विकले जात आहे. ज्यात आता आणखी दोन रुपयांनी वाढ करण्यात आल्याने, ग्राहकांना आता एक लिटर गाईच्या दुधासाठी ५६ रुपये मोजावे लागणार आहे. १ जुलैपासून ही दरवाढ लागू करण्यात आली असून, ही दरवाढ प्रामुख्याने मुंबई आणि पुणे या ठिकाणच्या ग्राहकांना लागू करण्यात आल्याचे गोकुळकडून स्पष्ट करण्यात आले आहे.

‘या’ दूध संघांकडून दरात वाढ

दरम्यान, जून महिन्याच्या सुरुवातीला मदर डेअरीकडून दुधाच्या दरात प्रति लिटर २ रुपये वाढ करण्यात आली होती. तर अमूलने देखील आपल्या दूध दरात प्रति लिटर २ रुपयांनी वाढ केली होती. त्यानंतर कर्नाटकातील नंदिनी संघानेही दर वाढवले होते. त्यानंतर आता गोकुळने आपल्या दुध दरात वाढ करण्याचा निर्णय घेतला आहे. सध्याच्या घडीला खुल्या बाजारात दुधाचे भाव ९० रुपये प्रति लिटर आहे. तर गोकुळ दूध ७२ रुपये लिटर दराने मिळत आहे. मदर डेअरीचे एक लिटर दूध ७६ रुपये तर अमूल दूध ६८ रुपयांना विकले जात आहे.