रविवार, 18 ऑक्टोबर 2026
महाराष्ट्रातील तब्बल 394 शाळांचे वर्ग रिकामे, विद्यार्थ्यांची वानवा
394 schools in Maharashtra have zero students : राज्यातील शाळांबाबत एक धक्कादायक बातमी समोर आली आहे. प्रत्येकाच्या आयुष्यात शिक्षण हे खूप महत्त्वाचे असते. शिक्षणाने माणसाला खूप काही शिकायला मिळते. प्रत्येकजण लहान असतानाच शाळेत जातो , तिथेच त्यांचे प्राथमिक शिक्षण पुर्ण होते. मात्र आता शाळा आहेत पण शिक्षण घेण्यासाठी विद्यार्थी नाहीत असं धक्कादायक वास्तव समोर आलं आहे.
‘यूडायस-प्लस’ (U-Dice Plus Registration) वरील ३० सप्टेंबरपर्यंतच्या नोंदणीच्या आकडेवारीनुसार, राज्यातील सर्व प्रकारच्या श्रेणींतील ३९४ शाळांमध्ये एकाही विद्यार्थ्याची नोंदणी झाली नसल्याचे समोर आले आहे. सुमारे आठ हजार शाळांची पटसंख्या दहाच्याही खाली आहे.ग्रामीण भागातील शाळा रिकाम्या होत असल्याचं प्रमाण चिंताजनक असल्याचे दिसून येत आहे.
एका बाजूला शालेय शिक्षण विभागाने (School Education Department) गुणवत्तापूर्ण आनंददायी शिक्षणाची कास धरत असताना आणि शिक्षण विभागातील विविध घटक दर दिवशी नवनवीन उपक्रमांची सुरुवात करत असताना राज्यातील ग्रामीण आणि डोंगराळ, दुर्गम भागातील शाळांची परिस्थिती बिकट होत असल्याचे चित्र आहे.
राज्यात एकूण दोन कोटी ११ लाख ८६ हजार ९४३ विद्यार्थ्यांची नोंद झाली. ही संख्या गेल्या वर्षीच्या तुलनेत सुमारे सात हजारांनी अधिक आहे. मात्र त्याचवेळी पाच लाख विद्यार्थ्यांची नोंदणी अजूनही अपूर्ण आहे. त्यामुळे विद्यार्थीसंख्या लाखोंनी वाढेल, असे संकेत असले, तरी ग्रामीण शाळा रिकाम्या होण्याचे प्रमाणही चिंताजनक आहे.आकडेवारीनुसार, पुण्यात सर्वाधिक 37 शाळांत एकाही विद्यार्थ्याची नोंद झालेली नाही.
याचबरोबर रत्नागिरीतील २४ आणि नागपूरमधील २३ शाळांमध्ये एकही विद्यार्थी नाही. बुलढाण्यात २१ शाळा आहेत. या आकडेवारीनुसार, रत्नागिरी जिल्ह्यातील एकूण ७१३ शाळांची पटसंख्या 10 च्या खाली आहे. पु्ण्यात ६२७, रायगडमध्ये ६८२ आणि सिंधुदुर्गमध्ये ५६९ शाळांत एवढीच मोजकी विद्यार्थीसंख्या आहे. तर मुंबई उपनगरात ३६० शाळा, मुंबई शहरात ३४, ठाण्यात १९९ आणि पालघरमध्ये १२४ शाळा आहेत, ज्या विद्यार्थ्यांमध्ये १० जागा रिक्त आहेत त्यांची संख्या जास्त आहे. उर्वरित जिल्ह्यांमध्ये काही ठिकाणी २०० ते ३००, तर काही ठिकाणी १०० ते १५० शाळा अशा श्रेणीत आहेत. राज्यात एकूण सात हजार ९४६ शाळांत केवळ १ ते दहा विद्यार्थी नोंदले गेले आहेत.
