फोटो सौजन्य - Social Media
आज पर्यटनाचा चेहरामोहरा बदलत चाललाय. पूर्वी फक्त किल्ले, किल्ल्यांचे अवशेष, स्मारकं पाहणं हा पर्यटनाचा उद्देश असायचा. पण आता पर्यटक वेगळा अनुभव शोधत आहेत. अध्यात्मिक आणि धार्मिक पर्यटनासोबतच रिजेनरेटिव्ह टुरिझम, क्युरेटिव्ह टुरिझम, होमस्टे, फूड वॉक, स्थानिक कुकिंग क्लासेस यांचा क्रेझ झपाट्याने वाढतो आहे. पर्यटकांना फक्त फिरणं नको, तर स्थानिक संस्कृती आणि जीवनशैली जवळून अनुभवायची आहे.
यामुळे तरुणांसाठी या क्षेत्रात रोजगार आणि स्वरोजगार दोन्ही संधी उपलब्ध झाल्या आहेत. काही तरुण आपल्या शहरात फूड वॉक, शॉपिंग टूर, स्थानिक खाद्यसंस्कृतीची सफर घडवून आणत आहेत. कुणी धार्मिक स्थळांसाठी ग्रुप टूर आयोजित करत आहेत तर कुणी मनाली, शिमला, गोवा किंवा कोकण किनाऱ्यावर खास पॅकेजेस देत आहेत. यामुळे केवळ पर्यटकांनाच अनुभव मिळत नाही, तर स्थानिकांनाही रोजगाराची संधी मिळते.
या क्षेत्रात यशस्वी व्हायचं असेल तर स्टोरीटेलिंगची कला येणं गरजेचं आहे. पर्यटकांना मार्गदर्शन करण्यासोबत त्यांचं मन जिंकणं महत्त्वाचं ठरतं. टूर गाईड, टूर प्लॅनर, ट्रॅव्हल एजन्सी, हॉटेल-रेस्टॉरंट, रिसॉर्ट मॅनेजमेंट अशा अनेक मार्गांनी करिअर घडवता येऊ शकतं. शिवाय पार्ट-टाईम जॉब्सचीही संधी आहे, जसं की स्वतःचं घर होमस्टेसाठी उपलब्ध करून देणं किंवा डिजिटल मार्केटिंग सेवा पुरवणं.
पर्यटन क्षेत्रात करिअर करू इच्छिणाऱ्यांसाठी बीए टुरिझम अँड हॉस्पिटॅलिटी मॅनेजमेंटसारखे कोर्सेस अनेक विद्यापीठांमध्ये उपलब्ध आहेत. दिल्ली युनिव्हर्सिटी, जामिया मिलिया इस्लामिया, आयआयटीटीएम (Indian Institute of Tourism and Travel Management) आणि इग्नू ही काही प्रमुख संस्था आहेत.
आज भारतात घरगुती पर्यटन वेगाने वाढत आहे. अयोध्या राममंदिर, काशीधाम, महाकाल, तसेच क्रूझ टुरिझम यांसारख्या नवीन संकल्पनांमुळे मोठ्या प्रमाणावर रोजगार निर्माण होत आहेत. सरकारही या क्षेत्राला प्रोत्साहन देत आहे. म्हणूनच पर्यटन क्षेत्र हे उद्योजकता आणि आत्मनिर्भरतेसाठी उत्तम व्यासपीठ ठरत आहे.
एकंदरीत, जर तुम्हाला लोकांशी संवाद साधायला, फिरायला आणि नवीन अनुभव द्यायला आवडत असेल, तर पर्यटन क्षेत्र तुमच्यासाठी सर्वोत्तम करिअर पर्याय ठरू शकतो.
.png "Videos"){kind=small}
