रविवार, 18 ऑक्टोबर 2026
Asim Sarode News: 'भाजप आमदाराकडून माझ्या जिवाला धोका'; असीम सरोदेंचे आरोप कुणावर?
राम खाडे यांच्यावर हल्ला झाल्यानंतर त्यांच्या निकटवर्तीयांनीही आमदार सुरेश धस यांच्यावर थेट आरोप केले होत. खाडे यांनी उघड केलेल्या जमीन प्रकरणामुळेच त्यांच्यावर हल्ला झाल्याचा संशय व्यक्त करण्यात येत आहे. राम खाडे यांच्यावर झालेल्या हल्ल्यात ते गंभीर जखमी झाले असून त्यांच्यावर सध्या पुण्यात उपचार सुरू आहेत. त्यांची प्रकृती नाजूक असल्याचे समजते. त्यातच वकील सरोदे यांनी केलेल्या खुलाशानंतर राजकीय वर्तुळात एकच खळबळ उडाली आहे.
एका वृत्तवाहिनीशी बोलताना असीम सरोदे (Asim Sarode) म्हणाले, “हजारो एकर देवस्थानची जमीन भाजप (BJP) आमदार सुरेश धस यांच्या पुढाकारातून खासगी मालमत्तेसारखी दाखवण्यात आली. त्यांनी स्वतःच्या पदाचा गैरवापर करून अनेक देवस्थानांच्या जमिनी बळकावल्या. त्या जमिनींवर प्लॉट पाडले आणि ते प्लॉट विकले. हा खूप मोठा आर्थिक घोटाळा आहे. हे सर्व प्रकरण राम खाडे यांनी समोर आणले होते,” असा दावा सरोदे यांनी केला. राम खाडे यांनी हे प्रकरण उघड केल्यानंतर त्यांच्यावर प्राणघातक हल्ला झाल्याने राजकीय वातावरण ढवळून निघाले आहे. या प्रकरणी प्रशासन आणि पोलीस विभागावरही अपेक्षेच्या नजरा लागल्या आहेत.
राम खाडे यांनी माहितीच्या अधिकारातून (RTI) मोठ्या प्रमाणावर दस्तऐवज मिळवून या घोटाळ्याचा पर्दाफाश केला होता, “हे संपूर्ण प्रकरण बीडमधील आहे. देवस्थानांच्या हजारो एकर जमिनी हडप करण्यात आल्या, तेही एका भाजप आमदाराच्या माध्यमातून. हा अत्यंत गंभीर प्रकार होता. आम्ही याबाबत स्थानिक पोलिसांकडे तक्रार केली होती, पण पोलिसांनी दखल घेतली नाही. पोलिसांकडून प्रतिसाद न मिळाल्याने, पुढील पाऊल म्हणून राम खाडे यांच्या माध्यमातून मुंबईतील ईडी (अंमलबजावणी संचालनालय) कार्यालयात अधिकृत तक्रार दाखल करण्यात आली. त्या तक्रारीसोबत 200 ते 300 हून अधिक कागदपत्रे जोडलेली होती,” असा दावा सरोदे यांनी केला.
दरम्यान, हे प्रकरण उघड केल्यानंतरच राम खाडे यांच्यावर प्राणघातक हल्ला झाल्याने मोठी खळबळ उडाली आहे. तपास यंत्रणांवर आता या संपूर्ण प्रकरणाच्या सखोल चौकशीसाठी दडपण वाढले आहे. 1000 कोटी रुपयांहून अधिक किमतीच्या देवस्थानांच्या जमिनींचा घोटाळा भाजपा आमदार सुरेश धस यांनी केल्याचे या पुराव्यांमधून स्पष्टपणे दिसून येत आहे.” याच प्रकरणामुळे आता आमदार सुरेश धस यांच्याकडून माझ्या जीवाला देखील धोका आहे, असा धक्कादायक दावा त्यांनी केला.
देवस्थानांच्या जमिनींच्या कथित गैरव्यवहाराबाबत सुरेश धस यांच्या अडचणीत मोठी वाढ होत असल्याचे या प्रकरणातून स्पष्ट होत आहे. आरोपांचे गांभीर्य वाढत असताना, भाजपाची या संपूर्ण प्रकरणावरील भूमिका काय असेल, याकडे सर्वांचे लक्ष लागले आहे.
