बुधवार, 21 ऑक्टोबर 2026
प्रदूषण नियमांचे उल्लंघन भोवले; तुर्भे सेक्टर 19 मधील बांधकाम साईट सील
मुंबई उच्च न्यायालयाने स्वतःहून दाखल करून घेतलेल्या जनहित याचिका क्र. 3/2023 मध्ये 24 डिसेंबर 2025 रोजी आदेश देत शहरांमधील वाढत्या वायू प्रदूषणावर तात्काळ आणि प्रभावी उपाययोजना करण्याचे निर्देश दिले होते. या आदेशाच्या पार्श्वभूमीवर नवी मुंबई महानगरपालिकेने आपल्या कार्यक्षेत्रातील बांधकाम प्रकल्पांसाठी प्रदूषण नियंत्रणासंदर्भात नियम निश्चित केले आहेत.
Navi mumbai Crime: प्रेमसंबंधातून घडलं धक्कादायक कृत्य; गार्डनमध्ये भेट अन् मोठा ट्विस्ट
बांधकामाच्या ठिकाणी होणारे वायू प्रदूषण, ध्वनी प्रदूषण तसेच ब्लास्टिंगच्या कामांसाठी अवलंबायची मानक कार्यप्रणाली महापालिकेने जाहीर केली होती. या नियमांचे काटेकोरपणे पालन करण्याच्या सूचनाही सर्व बांधकाम व्यावसायिक आणि बांधकामधारकांना देण्यात आल्या होत्या.
महापालिकेने निश्चित केलेल्या प्रदूषण नियंत्रण नियमांचे उल्लंघन होत असल्याचे आढळलेल्या बांधकाम व्यावसायिकांना यापूर्वी नोटिसा बजावण्यात आल्या होत्या. नोटीस मिळाल्यानंतरही ज्या ठिकाणी आवश्यक सुधारणा करण्यात आल्या नाहीत, अशा बांधकाम व्यावसायिकांवर दंडात्मक कारवाई करण्यात आली. महापालिका प्रशासनाकडून बांधकामांच्या ठिकाणांची पाहणी करून प्रदूषण नियंत्रणाच्या उपाययोजनांची अंमलबजावणी होते की नाही, यावर लक्ष ठेवण्यात येत आहे.
महापालिका आयुक्त डॉ. कैलास शिंदे यांच्या पाहणी दौऱ्यादरम्यान तुर्भे सेक्टर 19 मधील भूखंड क्रमांक 11 येथील मे. शेलटॉन इन्फ्रास्ट्रक्चर प्रा. लि. यांच्या बांधकाम साईटची पाहणी करण्यात आली. या पाहणीदरम्यान संबंधित बांधकाम साईटवर मानक कार्यप्रणालीतील अनेक नियमांचे उल्लंघन झाल्याचे निदर्शनास आले. त्यानंतर संबंधित कंपनीला प्रदूषण नियंत्रणासाठी आवश्यक उपाययोजना तातडीने करण्याबाबत नोटीस बजावण्यात आली होती.
नोटीस बजावल्यानंतर संबंधित बांधकाम व्यावसायिकाकडून नियमांनुसार आवश्यक सुधारणा होणे अपेक्षित होते. मात्र, साईटवर अपेक्षित सुधारणा झाल्याचे आढळून न आल्याने तुर्भे विभाग कार्यालयाने कारवाईचा बडगा उगारला. संबंधित बांधकाम साईट सीलबंद करण्यात आली. ही कारवाई नवी मुंबई महानगरपालिकेच्या पर्यावरण विभागाच्या माध्यमातून करण्यात आली. तुर्भे विभागाचे सहाय्यक आयुक्त तथा विभाग अधिकारी सागर मोरे यांच्या नियंत्रणाखाली अधिकारी आणि कर्मचाऱ्यांनी कारवाई केली. कनिष्ठ अभियंता विनोद आंब्रे यांचाही कारवाईत सहभाग होता.
सीलबंद कारवाईच्या वेळी कोणताही अनुचित प्रकार घडू नये यासाठी आवश्यक बंदोबस्त ठेवण्यात आला होता. मोहिमेत अतिक्रमण निर्मूलन पथकातील पोलीस अधिकारी आणि अंमलदारांसह अतिक्रमण विभागातील सुरक्षारक्षक तैनात करण्यात आले होते.
नवी मुंबईत मोठ्या प्रमाणावर बांधकाम प्रकल्प सुरू असल्याने बांधकामातून निर्माण होणारी धूळ, आवाज आणि इतर प्रकारचे प्रदूषण नियंत्रणात ठेवणे महत्त्वाचे ठरत आहे. त्यासाठी महापालिकेने निश्चित केलेल्या मानक कार्यप्रणालीचे पालन करणे बांधकाम व्यावसायिकांसाठी आवश्यक आहे. नोटीस आणि दंडात्मक कारवाईनंतरही नियमांचे पालन न केल्यास थेट साईट सीलबंद करण्याची कारवाई होऊ शकते, असा स्पष्ट संदेश तुर्भेतील या कारवाईतून देण्यात आला आहे.
