वैजापूरमध्ये पुरोहिताची हत्या; मृतदेहाजवळ आढळले ‘वशीकरण’ पुस्तक

वैजापूर शहरानजीकच्या नारंगी मध्यम प्रकल्प परिसरात गवळीबाबा मंदिर आहे. या मंदिराजवळ असलेल्या एका झोपडीत पुरोहित कैलास चव्हाण राहात होते. गेल्या दीड वर्षांपासून या मंदिरात पौरोहित्य करून ते तेथेच राहत असल्याचे परिसरातील नागरिकांचे म्हणणे आहे.

औरंगाबाद – वैजापूरमध्ये (Vaijapur) पुरोहिताची हत्या (Purohit Murder) करण्यात आली आहे. वैजापूर हरालगतच्या नारंगी मध्यम प्रकल्प (Narangi Central Project) परिसरात मंदिरात (Tempel) पौरोहित्य करणाऱ्या ५५ वर्षीय पुरोहिताची हत्या करण्यात आल्याची घटना शुक्रवारी समोर आली आहे. हत्येचा उलगडा अद्याप झाला नसला तरी, पुरोहिताच्या हातासह डोक्यावर मारहाणीच्या खूणा दिसून आल्या. कैलाश गणपत चव्हाण (रा. बुरुडगाव रोड-अहमदनगर) असे मृत पुरोहिताचे नाव आहे.

वैजापूर शहरानजीकच्या नारंगी मध्यम प्रकल्प परिसरात गवळीबाबा मंदिर आहे. या मंदिराजवळ असलेल्या एका झोपडीत पुरोहित कैलास चव्हाण राहात होते. गेल्या दीड वर्षांपासून या मंदिरात पौरोहित्य (Priesthood) करून ते तेथेच राहत असल्याचे परिसरातील नागरिकांचे म्हणणे आहे. शुक्रवारी दुपारच्या सुमारास परिसरातील एका शेतकऱ्यास मंदिराच्या पाठिमागील बाजूस पुरोहिताचा मृतदेह दिसला. त्याने घटनेची माहिती तात्काळ वैजापूर पोलिसांना दिली.

वैजापूर पोलिसांनी माहिती मिळताच घटनास्थळी धाव घेतली. यावेळी चव्हाण यांचा मृतदेह गवळीबाबा मंदिराच्या बाजूला असलेल्या झाडाझुडुपात आढळून आला. पाहणीदरम्यान घटनास्थळी पोलिसांना सायकल आणि थोड्याच अंतरावर काठीही आढळून आली. याशिवाय याच ठिकाणी असलेल्या एका पिशवीत ‘वशीकरण’ शीर्षक असलेले पुस्तकही पोलिसांना आढळले. त्यामुळे पोलिसांनी पंचनामा करत, पुढील तपास सुरु केला आहे.