सोमवार, 19 ऑक्टोबर 2026
सौजन्य फोटो - सौशल मिडीया
कोंढाळी : कोंढाळी-काटोल मार्गावरील कलकुही शिवारात क्रुझर आणि दुचाकीच्या भीषण धडकेत तीन तरुणांचा जागीच मृत्यू झाला. शनिवारी, १७ तारखेला मध्यरात्रीच्या सुमारास हा अपघात घडला. मृतांमध्ये अवघ्या तीन महिन्यांपूर्वी विवाह झालेल्या लोकेश जगदीश बारंगे याचाही समावेश आहे. देवीदर्शन करून परतणाऱ्या तिन्ही तरुणांचा प्रवास अखेरचा ठरल्याने त्यांच्या कुटुंबांवर दुःखाचा डोंगर कोसळला आहे.
दीपांशु दामोदर चाफले (२५), रोशन मारोती चाफले (२५) आणि लोकेश जगदीश बारंगे (२५) हे तिघे एकाच दुचाकीवरून काटोल येथे देवीदर्शनासाठी गेले होते. दर्शन आटोपून ते कोंढाळीकडे परतत असताना कलकुही शिवारात त्यांच्या दुचाकीला क्रुझरने जोरदार धडक दिली. मिळालेल्या माहितीनुसार, क्रुझर कोंढाळीकडून मोहगाव येथील भाविकांना घेऊन काटोल-पारहसिंगा परिसरात देवीदर्शनासाठी जात होती. या धडकेत दुचाकीवरील तिघेही रस्त्यावर कोसळले. अपघाताची तीव्रता इतकी होती की तिन्ही तरुणांचा घटनास्थळीच मृत्यू झाला.
या अपघातातील लोकेश बारंगे याचा अवघ्या तीन महिन्यांपूर्वी विवाह झाला होता. नव्या संसाराची स्वप्ने रंगवत असतानाच पतीचा मृत्यू झाल्याने त्याच्या पत्नीवर दुःखाचा डोंगर कोसळला आहे. देवीदर्शनासाठी मित्रांसोबत घराबाहेर पडलेला लोकेश पुन्हा परतलाच नाही. त्याचे पार्थिव घरी पोहोचल्यानंतर कुटुंबीयांवर शोककळा पसरली. अपघातात मृत्युमुखी पडलेला रोशन चाफले हा विवाहित होता. त्याला एक मुलगा आणि एक मुलगी आहे. तर दीपांशु चाफले हा अविवाहित होता. तिन्ही तरुणांच्या मृत्यूने त्यांच्या कुटुंबीयांवर दुःखाचा डोंगर कोसळला आहे.
दीपांशु चाफले, रोशन चाफले आणि लोकेश बारंगे हे तिघेही मूळचे वर्धा जिल्ह्यातील कारंजा घाडगे येथील रहिवासी होते. ते कोंढाळीतील विकासनगर परिसरात भाड्याने राहत होते. तिघेही एका खासगी कंपनीत कामगार म्हणून कार्यरत होते.
अपघातानंतर क्रुझरचालकाने जखमींना मदत न करता वाहनासह काटोलच्या दिशेने निघून गेल्याची माहिती आहे. दरम्यान, कामावरून दुचाकीने कोंढाळीकडे येणाऱ्या जुबेर शेख आणि सागर भारसाकळे यांनी अपघात पाहिल्यानंतर मदतीसाठी धाव घेतली. त्यांनी सामाजिक कार्यकर्ते संजय गायकवाड आणि कोंढाळी पोलिसांना घटनेची माहिती दिली. माहिती मिळताच कोंढाळीचे ठाणेदार सुमित परतेकी आणि संजय गायकवाड रुग्णवाहिकेसह घटनास्थळी पोहोचले. मात्र, तोपर्यंत तिन्ही तरुणांचा मृत्यू झाला होता. मृतदेह शवविच्छेदनासाठी काटोल ग्रामीण रुग्णालयात पाठवण्यात आले. या प्रकरणी कोंढाळी पोलिसांनी अपघाताचा गुन्हा दाखल करून क्रुझरचालक हेमराज गणपत उईके याला अटक केली आहे. ठाणेदार सुमित परतेकी पुढील तपास करीत आहेत.
क्रुझरची दुचाकीला धडक कशामुळे बसली, याचे नेमके कारण अद्याप स्पष्ट झालेले नाही. चालकाला डुलकी लागली होती की अपघातामागे अन्य काही कारण होते, याचा तपास पोलिसांकडून सुरू आहे. तपासातून अपघाताचे नेमके कारण स्पष्ट होणार आहे.
Ans: नागपूर जिल्ह्यातील कोंढाळी-काटोल मार्गावरील कलकुही शिवारात हा अपघात झाला.
Ans: लोकेशचा अवघ्या तीन महिन्यांपूर्वी विवाह झाला होता. त्याच्या मृत्यूमुळे नवविवाहित पत्नीवर दुःखाचा डोंगर कोसळला आहे.
Ans: दुचाकीवरील दीपांशु चाफले, रोशन चाफले आणि लोकेश बारंगे या तीन तरुणांचा मृत्यू झाला.
