सोमवार, 19 ऑक्टोबर 2026
संग्रहित फोटो
लोणावळा : पर्यटनासाठी प्रसिद्ध असलेल्या लोणावळ्यातील लायन्स पॉइंट येथे रविवारी धक्कादायक घटना घडली. एका महिलेने आपल्या आठ वर्षांच्या मुलीसह सुमारे १०० फूट खोल दरीत उडी घेतल्याची माहिती समोर आली आहे. सुदैवाने मायलेकी झाडाच्या फांद्यांमध्ये अडकल्याने त्यांचे प्राण वाचले.
मिळालेल्या माहितीनुसार, कौटुंबिक वादातून महिलेने हे टोकाचे पाऊल उचलल्याचे सांगितले जात आहे. दरीत पडल्यानंतर आई आणि मुलगी झाडाच्या फांद्यांमध्ये अडकल्या. घटनेची माहिती मिळताच लोणावळा पोलीस आणि शिवदुर्ग रेस्क्यू टीमने घटनास्थळी धाव घेतली.
सुमारे १०० फूट खोल दरीत अडकलेल्या मायलेकींना दोरीच्या साहाय्याने अत्यंत काळजीपूर्वक बाहेर काढण्यात आले. या घटनेत दोघींनाही किरकोळ दुखापत झाली असून, महिलेला उपचारासाठी लोणावळ्यातील खासगी रुग्णालयात दाखल करण्यात आले आहे.
वेळीच बचावकार्य झाल्याने मोठी दुर्घटना टळली. या घटनेमागील नेमके कारण काय होते, याचा लोणावळा ग्रामीण पोलीस तपास करत आहेत.
