मंगळवार, 20 ऑक्टोबर 2026
ममता बॅनर्जींच्या भाचीचा मृत्यू की घातपात? घरात मृतावस्थेत आढळल्याने खळबळ, शिक्षक भरती प्रकरणानंतर गेली होती नोकरी
प्राथमिक माहितीनुसार, मंगळवारी सकाळी सुमारे ९ वाजण्याच्या सुमारास घराच्या दुसऱ्या मजल्यावरील एका खोलीत ब्रिस्टी मृतावस्थेत आढळली. कुटुंबीयांनी याची माहिती रामपूरहाट पोलिसांना दिली. या घटनेची माहिती मिळताच पोलीस घटनास्थळी दाखल झाले. त्यानंतर मृतदेह ताब्यात घेऊन शवविच्छेदनासाठी रामपूरहाट शासकीय वैद्यकीय महाविद्यालय आणि रुग्णालयात पाठवण्यात आला. मृत्यूमागील नेमके कारण शवविच्छेदन अहवाल आणि पोलीस तपासानंतर स्पष्ट होण्याची अपेक्षा आहे.
ब्रिस्टी मुखर्जीला मार्च २०२३ मध्ये बोलपूर येथील एका उच्च प्राथमिक शाळेत शिक्षकेतर कर्मचारी म्हणून नोकरी मिळाली होती. पश्चिम बंगालमधील बहुचर्चित शाळा भरती प्रकरणात हजारो शिक्षक आणि शिक्षकेतर कर्मचाऱ्यांच्या नियुक्त्यांवर प्रश्न उपस्थित करण्यात आले होते. या भरती प्रक्रियेतील कथित अनियमिततांमुळे सुमारे २६ हजार शिक्षक आणि शिक्षकेतर कर्मचाऱ्यांच्या नियुक्त्या रद्द करण्याचे प्रकरण न्यायालयापर्यंत पोहोचले. कलकत्ता उच्च न्यायालयाच्या निर्णयानंतर सर्वोच्च न्यायालयातही या प्रकरणाची सुनावणी झाली.
मिळालेल्या माहितीनुसार, न्यायालयीन निर्णयामुळे नोकरी प्रभावित झालेल्या उमेदवारांच्या यादीत ब्रिस्टी मुखर्जीचे नाव ६०८ व्या क्रमांकावर होते. मात्र तिच्या कुटुंबीयांनी वेगळी बाजू मांडली आहे. ब्रिस्टीने आरोग्याच्या कारणांमुळे केवळ एक दिवस काम केल्यानंतर पदाचा राजीनामा दिला होता, असा कुटुंबीयांचा दावा आहे.
न्यायालयीन प्रक्रियेनंतर आणि नोकरीसंदर्भातील घडामोडींमुळे ब्रिस्टी तणावाखाली असल्याचा दावा काही सूत्रांच्या हवाल्याने करण्यात आला आहे. मात्र तिच्या मृत्यूचे कारण अद्याप अधिकृतरीत्या निश्चित झालेले नाही. त्यामुळे नोकरी जाणे आणि तिचा मृत्यू यांच्यात थेट संबंध असल्याचा निष्कर्ष तपास पूर्ण होण्यापूर्वी काढता येणार नाही.
ब्रिस्टीचे वडील निहार मुखर्जी हे ममता बॅनर्जी यांच्या मामाचे पुत्र असल्याचे सांगितले जाते. ते स्थानिक पातळीवरील तृणमूल काँग्रेसचे नेते असल्याचीही माहिती आहे. त्यामुळे ब्रिस्टीच्या मृत्यूच्या घटनेला राजकीय पार्श्वभूमीही प्राप्त झाली आहे.
हे प्रकरण २०१६ मध्ये पश्चिम बंगाल स्कूल सर्व्हिस कमिशनकडून घेण्यात आलेल्या राज्यस्तरीय निवड परीक्षेशी संबंधित आहे. या प्रक्रियेत शिक्षक आणि शिक्षकेतर कर्मचाऱ्यांच्या नियुक्त्यांमध्ये कथित आर्थिक व्यवहार आणि अनियमितता झाल्याचे आरोप करण्यात आले. या प्रकरणात पश्चिम बंगालचे तत्कालीन शिक्षणमंत्री पार्थ चटर्जी यांच्यासह विविध व्यक्तींवर तपास यंत्रणांनी कारवाई केली होती. आयोग आणि शिक्षण मंडळाशी संबंधित काही अधिकाऱ्यांवरही तपास यंत्रणांकडून कारवाई करण्यात आली. दरम्यान, ब्रिस्टी मुखर्जीच्या मृत्यूचे नेमके कारण अद्याप स्पष्ट झालेले नसून रामपूरहाट पोलीस सर्व शक्यता तपासत आहेत. शवविच्छेदन अहवाल आणि पुढील तपासातूनच घटनेमागील वस्तुस्थिती समोर येणार आहे.
तेल गेले, तूप गेले, हाती…! Mamta Banarjee ची स्वतःच्याच पक्षातून हकालपट्टी; बंडखोर गटाने थेट…
