शुक्रवार, 16 ऑक्टोबर 2026
संग्रहित फोटो
बनावट प्रमाणपत्रांच्या आधारे भरती झालेल्या १९ उमेदवारांपैकी १० जणांना अद्याप सेवेत हजर करून घेण्यात आले नव्हते. तर उर्वरित नऊ जणांना विविध पोलीस प्रशिक्षण केंद्रांमध्ये प्रशिक्षणासाठी पाठवण्यात आले होते. मात्र प्रकरण उघडकीस आल्यानंतर या नऊ जणांनाही तातडीने प्रशिक्षण केंद्रातून परत बोलावण्याचे आदेश देण्यात आले आहेत.
पुणे शहर पोलीस दलाच्या २०२४-२६ मधील भरती प्रक्रियेदरम्यान कुराश आणि ड्रॅगनबोट या खेळांची बनावट प्रमाणपत्रे वापरून १९ उमेदवार भरती झाल्याची गुप्त माहिती एका सजग नागरिकाने पोलिसांना दिली. त्याने संबंधित पुरावेही पोलिसांकडे सादर केले. त्यानंतर पोलिसांनी या प्रकरणाची सखोल चौकशी सुरू केली.
हेही वाचा: Crime News: ‘पोलिस अधिकारी आहे’ म्हणत धमकी; ऑनलाइन गेममधील मैत्रीचा इंजिनिअरला बसला फटका
पोलिसांच्या तपासात २०१६ ते २०२६ या दहा वर्षांच्या कालावधीत कुराश खेळाच्या प्रत्यक्ष कोणत्याही स्पर्धा आयोजित न करताच त्या झाल्याचे कागदोपत्री दाखवण्यात आल्याचे समोर आले. त्यानंतर याच बनावट कागदपत्रांच्या आधारे प्रमाणपत्रे तयार करण्यात आल्याचे तपासात निष्पन्न झाले आहे.
या प्रकरणाचा अधिक तपास करत गुन्हे शाखेने महाराष्ट्र राज्य कुराश असोसिएशनचे अध्यक्ष अंकुश नागर आणि सचिव शिवाजी साळुंखे यांच्यासह चार जणांना अटक केली आहे. यामध्ये क्रीडा प्रशिक्षण केंद्र चालवणाऱ्या व्यक्तींचाही समावेश आहे. याच केंद्रांवर बनावट प्रमाणपत्रे तयार केली जात असल्याचा गंभीर आरोप आहे. या प्रकरणी वरिष्ठ निरीक्षक दीपक लगड यांच्या फिर्यादीवरून शिवाजीनगर पोलीस ठाण्यात गुन्हा दाखल करण्यात आला आहे.
या संपूर्ण प्रकरणाची व्याप्ती मोठी असल्याचे तपासातून समोर येत आहे. कुराश खेळाच्या तालुका, जिल्हा आणि राज्यस्तरीय स्पर्धांचे आयोजन करणाऱ्या १९ संघटनांची माहिती गुन्हे शाखेने संकलित केली आहे. या संघटना चालवणाऱ्या संशयित पदाधिकाऱ्यांचीही कसून चौकशी करण्यात येणार आहे. बनावट प्रमाणपत्रे तयार करणे आणि त्यांचा वापर करून पोलीस भरती मिळवण्याच्या या प्रकरणात आणखी काही जणांचा सहभाग असल्याचा पोलिसांना संशय आहे. या रॅकेटमध्ये सहभागी असलेल्या इतर व्यक्तींची चौकशी करून त्यांच्यावरही लवकरच कठोर कायदेशीर कारवाई केली जाणार असल्याची माहिती वरिष्ठ पोलीस अधिकाऱ्यांनी दिली.
Ans: कुराशच्या बनावट प्रमाणपत्रांच्या आधारे भरती झालेल्या १९ उमेदवारांवर कारवाई होणार आहे
Ans: राज्य सरकारच्या खेळाडूंसाठी असलेल्या पाच टक्के आरक्षणाचा गैरफायदा घेतल्याचा आरोप आहे.
Ans: प्रशिक्षण केंद्रांमध्ये असलेल्या नऊ उमेदवारांना तातडीने परत बोलावण्याचे आदेश देण्यात आले आहेत.
