शनिवार, 17 ऑक्टोबर 2026
संग्रहित फोटो
पुणे : राज्यात गुन्हेगारीचे प्रमाण मोठ्या प्रमाणात वाढले आहे. राज्यातील वेगवेगळ्या भागातून दररोज गुन्हेगारीच्या घटना उघडकीस येत असतात. अशातचं अता रात्री शेकोटीला शेकत बसलेल्या तरुणाला टोळक्याने लाकडी दांडक्याने बेदम मारहाण केल्याचा धक्कादायक प्रकार उघडकीस आला आहे. तो पळून गेला असताना त्याचा पाठलाग करुन घराबाहेर ठेवलेल्या भांड्यांची नासधुस करण्याचा प्रकार बुधवारी पहाटे घडला आहे. याप्रकरणी करण भानुदास आगलावे (वय २०, रा. लोहियानगर) यांनी खडक पोलीस ठाण्यात तक्रार दिली आहे. त्यावरुन अफ्रिदी शेख, सुफियान शेख, शहादाब शेख, अबु शेख यांच्यावर गुन्हा दाखल केला आहे.
नेमकं काय घडलं?
पोलिसांच्या माहितीनुसार, राहुल शेंडगे, गणेश खानविलकर हे लोहियानगर येथे शेकोटी करुन बसले होते. करण आगलावे रात्री साडेबारा वाजता शेकोटीच्या इथे येऊन गप्पा मारु लागले. त्यावेळी आफ्रिदी ऊर्फ बुढ्ढा शेख हा त्यांच्याकडे आला. शिवीगाळ करुन तो मारहाण करुन लागला. तेव्हा करण व इतर सर्व गल्लीत घुसले. त्यांच्या मागोमाग टोळके आले. ते लाकडी दांडके घेऊन करण याला मारहाण करु लागले. तेव्हा ते राहुल शेंडगे याच्या घराजवळ लपून बसले. त्यावेळी सर्व जण शेंडगे यांच्या घरासमोर येऊन राहुल कुठे आहे, अशी विचारणा करीत घराबाहेर ठेवलेल्या भांड्यांची नासधुस केली. नंतर ते शिवीगाळ करत तेथून निघून गेले. अधिक तपास पोलीस निरीक्षक शशिकांत चव्हाण करीत आहेत.
हे सुद्धा वाचा : न्यायाधीशानेच जामीन देण्यासाठी मागितली लाच; वाचा संपूर्ण प्रकरण
राज्यात गुन्हेगारीचे प्रमाण वाढले
राज्यात गुन्हेगारीचे प्रमाण मोठ्या प्रमाणात वाढले आहे. दरम्यान गेल्या काही दिवसाखाली छत्रपती संभाजीनगरमध्ये जुन्या भांडणाच्या कारणातून 26 वर्षीय तरुणाचा धारदार शस्त्राने खून करण्यात आला. ही घटना सोमवारी (दि.2) सायंकाळी हसूल परिसरातील कारागृहाच्या बाजूच्या मैदानावर घडली. दिनेश उर्फ बबलू परमानंद मोरे (वय 26, रा. चेतनानगर, हसूल) असे मृत तरुणाचे नाव आहे. याप्रकरणी आरोपी अनिकेत गायकवाड व गणेश सोनवणे यांची नावे समोर आली असून, शोधासाठी चार पथके रवाना झाली. या हत्येप्रकरणामुळे परिसरात एकच खळबळ उडाली आहे.
दोन तरुणांवर कोयत्याने वार
गेल्या काही दिवसाखाली भरदुपारी कर्वे रस्त्यावरील प्रसिद्ध महाविद्यालय परिसरात फिल्मीस्टाईल टोळक्याने हातात कोयते घेऊन पाठलाग करत दोन तरुणांवर कोयत्याने वार केले. यात एका तरुणाची प्रकृती चिंताजनक असून, त्याच्यावर अतिदक्षता विभागात उपचार सुरू आहेत. तर, दुसऱ्याला डोक्यात वार करून जखमी केले आहे. भरदुपारी घडलेल्या याघटनेमुळे महाविद्यालय परिसरात चांगलाच गोंधळ निर्माण झाला होता. धक्कादायक म्हणजे, मैत्रिणीबद्दल अफवा पसरवतोय या संशयावरून टोळक्याने वार केले आहेत. घटनेची माहिती मिळताच परिमंडळ एकचे उपायुक्त संदिपसिंह गिल्ल व डेक्कन पोलीस घटनास्थळी दाखल झाले. पोलिसांनी जखमी असलेल्या तरुणांकडे चौकशी केली आहे. त्यानुसार गुन्हा दाखल करण्याची प्रक्रिया सुरू आहे. दरम्यान, पसार झालेल्या तरुणांचा शोध घेतला जात आहे.
