Uttarpradesh Crime: मैत्री, प्रेम आणि खून; १७ वर्षीय अल्पयीनीची हत्या करून बागेत पुरला मृतदेह, घटनास्थळी बॅग, सिंदूर…

प्रयागराजमध्ये 17 वर्षीय साक्षी यादवची तिच्याच प्रियकर हर्षवर्धन सिंहने हत्या करून बागेत पुरल्याचा धक्कादायक प्रकार उघडकीस आला. बॅग, सिंदूर आणि सीसीटीव्ही फुटेजमुळे पोलिसांनी तपास वेगाने उकलत आरोपीला अटक केली.

• प्रेमसंबंधातून वाद; हर्षवर्धनने साक्षीची 10 नोव्हेंबरला हत्या केली.
• मृतदेह बागेत पुरला; बॅग व वस्तू मिळाल्याने पोलिसांना संशय.
• सीसीटीव्हीत दोघे दिसल्याने आरोपीला ताब्यात घेतले.

उत्तर प्रदेश: उत्तर प्रदेशातील प्रयागराज जिल्ह्यात एक हृदयद्रावक आणि धक्कादायक घटना समोर आली आहे. १७ वर्षीय अल्पवयीन साक्षी यादव हिची तिच्याच प्रियकराने हत्या करून मृतदेह बागेत पुरल्याचा थरारक प्रकार उघडकीस आला आहे. घटनेची माहिती मिळताच पोलिसांनी तत्काळ घटनास्थळी धाव घेतली आणि तपासाची सूत्रे हाती घेतली.

जमिनीतून एका हाताचा भाग दिसून आला

मृत मुलगी साक्षी यादव (वय 17) ही प्रयागराजच्या लखराव गावातील रहिवासी होती. तर आरोपीचे नाव हर्षवर्धन सिंह असून तो सैन्यदलात कार्यरत असल्याची माहिती समोर आली आहे. पोलिसांनी घटनास्थळी पोहोचताच श्वानपथकाला मदतीसाठी बोलावले. श्वानांनी माती उकरण्याचा प्रयत्न केल्यानंतर जमिनीतून एका हाताचा भाग दिसून आला आणि त्यानंतर हा खून असल्याचे स्पष्ट झाले. त्या ठिकाणी साक्षीची बॅग आणि इतर काही वस्तू छिन्नविछिन्न अवस्थेत पडलेल्या होत्या. पोलिसांनी त्या वस्तू ताब्यात घेतल्या असता बॅगेवर आरोपी हर्षवर्धनचे नाव आढळले, ज्यामुळे तपास अधिक गतीने पुढे नेण्यात आला.

हर्षवर्धनला अटक

पोलिसांनी परिसरातील सर्व सीसीटीव्ही फुटेज तपासले. त्यात साक्षी ही हर्षवर्धनच्या मोटारसायकलवर बसून त्या भागात जाताना दिसली. या पुराव्यांच्या आधारे पोलिसांनी संशयित हर्षवर्धनला अटक केली. चौकशीदरम्यान हर्षवर्धनने गुन्ह्याची कबुली दिली.

विवाह ठरल्याने साक्षीने त्याला विरोध केला

हर्षवर्धन आणि साक्षी एकमेकांना बराच काळ ओळखत होते. सोशल मीडियावर झालेल्या ओळखीचे प्रेमात रुपांतर झाले. मात्र अलीकडेच हर्षवर्धनचा विवाह ठरल्याने साक्षीने त्याला विरोध केला. त्यांच्यातील वाद वाढू लागल्याने हर्षवर्धनने १० नोव्हेंबर रोजी साक्षीला भेटायला बोलावले. मोटारसायकलवर बसवून तिला बागेत नेले आणि तिथे तिची हत्या केली. गुन्हा लपवण्यासाठी त्याने मृतदेह मातीखाली पुरला.

तपास सुरु

घटनेनंतर पोलिसांनी मृतदेह ताब्यात घेऊन शवविच्छेदनासाठी पाठवला आहे. परिसरात या घटनेमुळे खळबळ उडाली असून अल्पवयीन मुलीवर झालेला हा अत्याचार समाजाला हादरवून सोडणारा आहे. पोलिसांकडून या प्रकरणाचा तपास वेगाने सुरू आहे.