रविवार, 18 ऑक्टोबर 2026
'दिल्लीसारखा बॉम्बस्फोट घडवू'; 'त्या' एका फोनने उडाली खळबळ
अमरावती : राजधानी दिल्लीत काही दिवसांपूर्वी बॉम्बस्फोट झाला होता. त्यानंतर आता अमरावती शहरात दिल्लीसारखा बॉम्बस्फोट करण्याची धमकी देणारा निनावी फोन कॉल आला. या फोननंतर शहर पोलिस प्रशासनासह सर्व सुरक्षा यंत्रणेमध्ये खळबळ उडाली. या कॉलनंतर संपूर्ण शहरात तत्काळ हाय अलर्ट जारी करण्यात आली.
पोलिसांनी रात्रभर नाकाबंदी, पेट्रोलिंग आणि संशयित ठिकाणांची तपासणी मोहीम सुरू ठेवत सुरक्षा व्यवस्था अधिक कडक केली. दिल्लीतील बॉम्ब स्फोटानंतर देशभरातील प्रशासकीय यंत्रणा अलर्ट झाली आहे. अशातच शुक्रवारी सायंकाळी शहर पोलिस नियंत्रण कक्षाला एक कॉल आला आणि त्या कॉलवर अमरावतीत बॉम्बस्फोट घडवण्याची धमकी देण्यात आली. हा फोन कॉल कुठून आला याचा तपास सुरू झाल्यानंतर, कॉल करणाऱ्या व्यक्तीचे लोकेशन इंदौरमध्ये असल्याचे तांत्रिक तपासातून स्पष्ट झाले. त्यानंतर अमरावती शहर पोलिसांनी इंदौर पोलिसांना तातडीने माहिती देत समन्वय साधला.
हेदेखील वाचा : Delhi Blast News: दिल्ली स्फोटासाठी उमर नबीला कार पुरवणाऱ्याला अटक; महत्त्वाचे खुलासे समोर येणार
दरम्यान, शहरातून एक विशेष पथक आरोपीचा शोध घेण्यासाठी इंदौरकडे रवाना झाले. शनिवारी (दि.२९) रात्री उशिरापर्यंत दोन्ही शहरांच्या पोलिसांकडून संयुक्तरित्या तपास सुरू होता. अमरावती ते इंदौरपर्यंतचा प्रवास हा बारा तासांवर आहे. त्यामुळे अमरावती पोलिस रात्री उशिरा इंदौर पोहोचणार आणि आरोपीला ताब्यात घेणार आहे.
फ्रेजरपुरा पोलिस ठाण्यात गुन्हा दाखल
फ्रेजरपुरा पोलिस ठाण्यात आरोपीविरुद्ध विविध कलमान्वये गुन्हा दाखल करण्यात आला आहे. सध्या दिल्लीचे प्रकरण ताजे आहे. त्यामुळे आरोपीने हे कृत्य कोणत्या हेतूने केले. त्यामागे आणखी कुणी आहे का? याचा शोध पोलिस घेत आहेत.
दिल्ली बॉम्बस्फोटप्रकरणी सात जण अटकेत
दिल्लीच्या ऐतिहासिक लाल किल्ल्याजवळ झालेल्या कार बॉम्बस्फोट प्रकरणातील तपासात राष्ट्रीय तपास यंत्रणा (एनआयए) ला मोठे यश मिळाले आहे. आत्मघाती हल्लेखोर उमर नबीच्या साथीदाराला अटक करण्यात आली असून, त्याची ओळख शोएब अशी झाली आहे. या प्रकरणात आतापर्यंत सात जणांना अटक करण्यात आली आहे.
हेदेखील वाचा : Red Fort Blast: मोठी बातमी! दिल्लीचा बॉम्बस्फोट हा दहशतवादी हल्लाच; एका संशयित व्यक्तीला अटक
