शनिवार, 24 ऑक्टोबर 2026
सौजन्य - सोशल मिडीया
शिक्रापूर : रांजणगाव एमआयडीसी (ता. शिरुर) येथील झामील स्टील कंपनीमध्ये क्रेनच्या सहाय्याने मोठमोठे पार्ट उचलत असताना क्रेनचे हुक तुटून पार्ट अंगावर पडल्याने एका कामगाराचा मृत्यू झाल्याची घटना घडली आहे. रांजणगाव एमआयडीसी पोलीस स्टेशन येथे आकस्मात मृत्यूची नोंद करण्यात आली आहे.
रांजणगाव एमआयडीसी (ता. शिरुर) येथील झामील स्टील कंपनीमध्ये शिवबाबू शाहू हा क्रेनच्या सहाय्याने लोखंडी पार्ट उचलत असताना अचानक क्रेनचे हुक तुटून लोखंडी वजनदार पार्ट शिवबाबूच्या छातीवर पडून त्यावेळी शिवबाबू पाठीमागे असलेल्या पार्टमध्ये अडकला गेला, दरम्यान अन्य कामगारांनी त्याला उपचारासाठी रुग्णालयात हलवले. मात्र उपचारापूर्वीच शिवबाबूचा मृत्यू झाल्याचे डॉक्टरांनी जाहीर केले.
सदर घटनेत शिवबाबू कमलेश शाहू (वय २३ वर्षे सध्या रा. ढोकसांगवी ता. शिरुर जि. पुणे ) याचा मृत्यू झाला आहे. याबाबत राजेश बुधानी शाहू (वय ३४ वर्षे रा. ढोकसांगवी ता. शिरुर जि. पुणे) यांनी रांजणगाव एमआयडीसी पोलीस स्टेशन येथे खबर दिल्याने पोलिसांनी आकस्मात मृत्यूची नोंद केली आहे. पुढील तपास पोलीस निरीक्षक महादेव वाघमोडे यांच्या मार्गदर्शनाखाली सहाय्यक पोलीस निरीक्षक मनोज नवसरे हे करत आहेत.
