दुचाकी जाळत तरुणाचा आत्महत्येचा प्रयत्न
सातपूर : त्र्यंबकरोडवरील आयटीआय सिग्नलजवळ शनिवारी दुपारी सुमारे दीडच्या सुमारास एका तरुणाने भररस्त्यात आपल्या दुचाकीला पेटवून आत्महत्या करण्याचा धक्कादायक प्रयत्न केल्याची घटना घडली. यावेळी दुचाकी पेट घेताच मोठा स्फोट होऊन आगीचा भडका उडाला आणि परिसरात क्षणात गोंधळ निर्माण झाला होता.
नागरिकांनी तत्काळ धाव घेऊन परिस्थिती नियंत्रणात आणण्याचा प्रयत्न केला. यावेळी सामाजिक कार्यकर्ते सचिन सिन्हा यांनी धैर्य दाखवत जळत्या दुचाकीजवळून तरुणाला मागे ओढून त्याचा जीव वाचवला. उपस्थित नागरिकांनी त्यांच्या या तत्परतेचे कौतुक केले आहे. दरम्यान, या घटनेची माहिती मिळताच सातपूर पोलीस तातडीने घटनास्थळी दाखल झाले आणि आत्महत्येचा प्रयत्न करणाऱ्या तरुणाला ताब्यात घेतले. अग्निशमन दलाच्या जवानांनी देखील वेळीच हस्तक्षेप करून दुचाकीवरील आग विझवली.
दरम्यान, या घटनेमुळे काही वेळ वाहतुकीची कोंडी निर्माण झाली होती. घटनेचा पुढील तपास सातपूर पोलीस करत आहेत. तरुणाने आत्महत्येचा प्रयत्न नेमक्या कोणत्या कारणासाठी केला हे अद्याप स्पष्ट झालेले नाही.
