शुक्रवार, 23 ऑक्टोबर 2026
महाराष्ट्र विधानसभा निवडणूक २०२४ चा प्रचाराची रणधुमाळी सुरु झाली आहे. निवडणूक आयोग ही मतदानाची पूर्वतयारी करत आहे. राज्यात या विधानसभेसाठी ९ कोटी ७० लाख २५ हजार ११९ मतदार कोटी मतदार आहेत. त्यातील दिव्यांग मतदारांची संख्ये बद्दल माहिती मुख्य निवडणूक अधिकारी कार्यालयाने दिली आहे. राज्यात एकूण ६ लाख ४१ हजार ४२५ दिव्यांग मतदारांची नोंदणी झाली आहे. यामध्ये ३ लाख ८४ हजार ६९ हे पुरुष मतदार आहेत तर २ लाख ५७ हजार ३१७ महिला दिव्यांग मतदार आहेत यासोबतच ३९ तृतीयपंथी दिव्यांग मतदार आहेत.
पुणे जिल्ह्यात सर्वाधिक दिव्यांग मतदार
दिव्यांग मतदारांमध्ये सर्वाधिक मतदार हे पुणे जिल्ह्यातील आहेत. पुणे येथे ८८ हजार ९३७ दिव्यांग मतदार नोंदणीकृत आहेत. यामध्ये ४८ हजार ६२६ पुरुष, ४० हजार ३०१ महिला आणि १० तृतीयपंथी दिव्यांग मतदारांचा समावेश आहे. पुणे पाठोपाठ ठाणे जिल्ह्यात ३८ हजार १४९ दिव्यांग मतदारांची नोंदणी झाली आहे. यामध्ये २१ हजार ५७३ पुरुष मतदार, १६ हजार ५७३ महिला मतदार आणि ३ तृतीयपंथी दिव्यांग मतदार आहेत. दिव्यांग मतदारांची सर्वात कमी नोंदणी गडचिरोली जिल्ह्यात आहे. येथे ६ हजार ४३ दिव्यांग मतदारांची नोंद आहे. यामध्ये ३ हजार ७१० पुरुष आणि २ हजार ३३३ महिला दिव्यांग मतदारांचा समावेश आहे.
तृतीयपंथी दिव्यांग मतदार
राज्यातील तृतीयपंथी दिव्यांग मतदारांची एकूण संख्या ३९ आहे. यापैकी सर्वाधिक तृतीयपंथी दिव्यांग मतदार हे औरंगाबाद जिल्ह्यामध्ये आहेत. औरंगाबादमध्ये एकूण १२ तृतीयपंथी दिव्यांग मतदार आहेत. पुणे जिल्ह्यात १०, नांदेड जिल्ह्यात ६, ठाणे जिल्ह्यात ३, पालघर आणि जळगाव जिल्ह्यात प्रत्येकी २ तृतीयपंथी दिव्यांग मतदारांची नोंदणी झाली आहे. याशिवाय लातूर, सोलापूर, मुंबई उपनगर आणि सांगली या जिल्ह्यांमध्ये प्रत्येकी १ तृतीयपंथी दिव्यांग मतदार नोंदणीकृत आहेत.
मतदान आणि मतमोजणी
राज्यात काल दि. ४ ऑक्टोबर २०२४ ला विधानसभा निवडणूक उमेदवारी अर्ज मागे घेण्याचा शेवटचा दिवस होता. त्यामुळे आजपासून सर्वत्र प्रचार सभा सुरु झाल्या आहेत. पुढील १२ दिवस उमेदवारांकडून प्रचार केला जाणार आहे. संपूर्ण महाराष्ट्रात बुधवार २० नोव्हेंबर २०२४ रोजी एकाच टप्प्यात मतदान पार पडणार आहे. तर २३ नोव्हेंबर २०२४ ला राज्याच्या विधानसभेचे निकाल जाहीर केले जाणार आहेत. या दिवशी महाराष्ट्र राज्यासोबत झारखंड राज्याचे निकालही जाहीर केले जाणार आहेत. झारखंडमध्ये दोन टप्प्यात मतदान केले जात आहे.
