बुधवार, 21 ऑक्टोबर 2026
(फोटो सौजन्य- सोशल मीडिया)
Big Boss 20 Contestants: सलमान खानच्या बहुचर्चित ‘बिग बॉस 20’ या शोची प्रेक्षक आतुरतेने वाट पाहत आहेत. 6 सप्टेंबरपासून या शोला सुरुवात होणार असून, यंदाच्या सीझनमध्ये कोणते सेलिब्रिटी स्पर्धक म्हणून घरात प्रवेश करणार, याची उत्सुकता शिगेला पोहोचली आहे. प्रीमियरपूर्वी अनेक सेलिब्रिटींची नावं चर्चेत आहेत.
माही विज
‘बालिका वधू’ आणि ‘लागी तुझसे लगन’ यांसारख्या लोकप्रिय मालिकांमधून घराघरात पोहोचलेली अभिनेत्री माही विज ‘बिग बॉस 20’मध्ये दिसणार असल्याची चर्चा आहे. माहीला टेलिव्हिजन क्षेत्रातील मोठा अनुभव आहे. तिचे पती जय भानुशाली ‘बिग बॉस 15’मध्ये स्पर्धक म्हणून सहभागी झाले होते.
अर्शिफा खान
सोशल मीडिया स्टार आणि अभिनेत्री अर्शिफा खान हिचे नावही ‘बिग बॉस 20’साठी चर्चेत आहे. बालकलाकार म्हणून करिअरला सुरुवात करणाऱ्या अर्शिफाने ‘एक वीर की अरदास: वीरा’, ‘उत्तरन’, ‘जिनी और जुजू’ आणि ‘मेरी दुर्गा’ यांसारख्या मालिकांमध्ये काम केले आहे. सोशल मीडियावर तिचा मोठा चाहतावर्ग आहे.
ईशा रिखी
पंजाबी अभिनेत्री ईशा रिखी हिच्या नावाचीही शोसाठी चर्चा आहे. ‘जट्ट बॉईज पुत्त जट्टन दे’ या पंजाबी चित्रपटातून तिने अभिनय क्षेत्रात पदार्पण केले. याशिवाय ती ‘हॅप्पी गो लकी’ आणि ‘अरदास’मध्येही दिसली आहे. मात्र, तिच्या वैयक्तिक आयुष्याबाबतच्या दाव्यांना अधिकृत पुष्टी मिळालेली नसल्याने ते सध्या केवळ चर्चेपुरतेच मर्यादित आहेत.
रिया अहिर
‘बिग बॉस 20’साठी चर्चेत असलेलं आणखी एक नाव म्हणजे रिया अहिर. मॉडेल, इन्फ्लुएन्सर आणि नाट्यकलाकार म्हणून रिया ओळखली जाते. विद्यार्थ्यांच्या आंदोलनादरम्यान पोलिसांची व्हॅन थांबवल्याच्या घटनेनंतर ती चर्चेत आली होती. गेल्या अनेक वर्षांपासून ती अभिनय क्षेत्राशी जोडलेली आहे.
काझी तौकीर
गायक काझी तौकीर याचं नावही ‘बिग बॉस 20’च्या संभाव्य स्पर्धकांमध्ये आहे. 2005 मध्ये ‘फेम गुरुकुल’चा विजेता ठरल्यानंतर तो प्रसिद्धीच्या झोतात आला. रूपरेखा बॅनर्जीसोबत त्याने हा शो जिंकला होता. गायकासोबतच काझीने अभिनय क्षेत्रातही काम केले आहे.
कनिका मान
‘गुड्डन तुमसे ना हो पाएगा’ या मालिकेमुळे लोकप्रिय झालेली अभिनेत्री कनिका मान हिचे नावही ‘बिग बॉस 20’साठी चर्चेत आहे. ‘खतरों के खिलाडी’मध्ये सहभागी झाल्यामुळेही ती चर्चेत राहिली आहे. ‘बढो बहू’मधून तिने अभिनय कारकिर्दीला सुरुवात केली. याशिवाय ती काही पंजाबी चित्रपटांमध्येही दिसली आहे.
गुल्लू आणि लव गिल यांचीही चर्चा
माही विज, अर्शिफा खान, ईशा रिखी, रिया अहिर, काझी तौकीर आणि कनिका मान यांच्यासोबतच गुल्लू उर्फ कुशल तंवर आणि लव गिल यांची नावंही ‘बिग बॉस 20’साठी चर्चेत आहेत.
प्रीमियरच्या आधी संभाव्य स्पर्धकांची आणखी एक मोठी यादी चर्चेत आहे. अभिनेत्री मौनी रॉय हिचं नावही या यादीत असल्याचं बोललं जात आहे. ‘नागिन’ मालिकेमुळे लोकप्रिय झालेली मौनी शोमध्ये सहभागी झाल्यास ही एक मोठी स्टार एंट्री ठरू शकते.
याशिवाय अभिनेत्री रिया चक्रवर्तीचा भाऊ शोविक चक्रवर्ती, अभिनेता फैसल खान आणि यूट्यूबर नितीश राजपूत यांचीही नावं संभाव्य स्पर्धक म्हणून चर्चेत आहेत.
दरम्यान, ‘बिग बॉस 20’च्या स्पर्धकांबाबत अधिकृत घोषणा होईपर्यंत ही नावं केवळ मीडिया रिपोर्ट्स आणि चर्चांपुरतीच आहेत. 6 सप्टेंबरच्या ग्रँड प्रीमियरनंतरच कोणते सेलिब्रिटी सलमान खानच्या शोमध्ये प्रत्यक्ष प्रवेश करणार, हे स्पष्ट होणार आहे.
