“हा तर मुस्लिमांच्या सन्मानाला धक्का पोहोचवण्याचा उद्देश..” ; मथुरेच्या मशिदीत सर्वेक्षणासाठी परवानगी देण्यात आल्यावर ओवेसी यांची पहिली प्रतिक्रिया

ओवेसी म्हणाले की, मथुरा वाद अनेक दशकांपूर्वी मस्जिद समिती आणि मंदिर ट्रस्ट यांच्या परस्पर संमतीने सोडवण्यात आला होता. मग ती काशी, मथुरा किंवा लखनौची मशीद असो. हा करार कोणीही वाचू शकतो. एक नवीन गट हे वाद वाढवत आहे, असा आरोप त्यांनी केला.

ते पुढे म्हणाले की, पूजा स्थळ कायदा आजही कायम आहे, मात्र या गटाने कायदा आणि न्यायालयीन प्रक्रियेची खिल्ली उडवली आहे. सर्वोच्च न्यायालयात 9 जानेवारी रोजी सुनावणी होणार होती, त्यामुळे सर्वेक्षण करण्याचा निर्णय द्यावा लागली अशी घाई काय होती.

ओवेसी म्हणाले की, आपल्या देशात सातत्याने मुस्लीम समुदायाला लक्ष्य केलं जात आहे. कृपया कोणीही आम्हाला गिव्ह अँड टेकचे (देवाण-घेवाण) उपदेश देऊ नये. हे लोक (भाजपा) कायदा मानत नाहीत. केवळ मुस्लिमांच्या प्रतिष्ठेला नख लावण्याचा प्रयत्न केला जात आहे.

काय प्रकरण आहे?
वृत्तसंस्था पीटीआयने हिंदू पक्षाच्या याचिकेचा हवाला देत म्हटले आहे की, मशिदीच्या खाली भगवान कृष्णाचे जन्मस्थान आहे आणि मशीद हिंदू मंदिर असल्याचे सिद्ध करणारे अनेक पुरावे आहेत.