सोमवार, 19 ऑक्टोबर 2026
नवी दिल्ली : राजस्थानातील (Rajasthan) जैसरमेलच्या जिल्हाधिकारी (collector) टीना डाबी (Teena Dabi) यांची लहान बहीण आणि आयएएस अधिकारी रिया डाबी यांचा विवाह झाल्याची माहिती समोर आली आहे. आयपीएस अधिकारी मनीष कुमार यांच्याशी त्यांनी एप्रिलमध्ये गुपचूप कोर्ट मॅरेज केल्याचं समोर आलंय. गृहमंत्रालयाच्या एका अधिसूचनेत ही बाब स्पष्ट झालेली आहे. रिया आणि मनीष यांनी विवाह केल्याचं यातून स्पष्ट झालेलं आहे. रिया या राजस्थान कॅडेरच्या आयएएस अधिकारी आहेत. त्यांचे पती मनिष हे महाराष्ट्र कॅडेरचे आयपीएस अधिकारी आहेत.
महाराष्ट्र कॅडरचे आयपीएस अधिकारी मनिष कुमार यांना राजस्थानात पाठवण्यात आल्याचं गृह मंत्रालयानं स्पष्ट केलेलं आहे. आयएएस अधिकारी रिया डाबी या राजस्थानात सेवेत आहेत. या अधिसूचनेत मनिष यांनी बदलीसाठी दोघांचं लग्न झाल्याचं कारण दिल्याचं स्पष्ट झालंय. रिया आणि मनिष हे 2021 सालच्या बॅचचे सिव्हिल अधिकारी आहेत.
टीना यांनी 2021 साली लोकसेवा आयोगाच्या परीक्षेत 15 वा नंबर मिळवत यश पटकावलं होतं. त्या सध्या राजस्थानच्या अलवर जिल्ह्याच्या जिल्हाधिकारी आहेत.
रिया यांची मोठी बहीण टीना डाबी या 2016 साली देशात पहिल्या क्रमांकान युपीएससीच्या परीक्षेत उत्तीर्ण झाल्या होत्या. त्याही सध्या राजस्थानात तैनात आहेत. टीना डाबी यांनी पहिला नंबर मिळवल्यानंतर त्या चर्चेत आल्या होत्या. 2018 साली त्यांनी आयएएस अधिकारी अतहर आमीर शेख यांच्याशी केलेल्या निकाहामुळं त्या पुन्हा चर्चेत आल्या. अतहरनं 2016 सालच्या युपीएससी परीक्षेत दुसरा क्रमांक मिळवला होता. मात्र लग्नाच्या काही वर्षांनंतर त्यांनी वेगवेगळं होण्याचा निर्णय घेतला.
काही काळानं दोघांनीही नवे साथीदार निवडले. त्यात टीना डाबी यांनी महाराष्ट्राच्या डॉ. प्रदीप गवांडे यांच्याशी केलेल्या विवाहानंतर त्या पुन्हा चर्चेत आल्या. हे दोघंही राजस्थान कॅडेरचे अधिकारी आहेत. तर अतहर यांनी डॉक्टर महरीन यांच्याशी निकाह केलाय.
