स्नॅक्ससाठी घरीच बनवा कच्या केळीचा खुशखुशीत चिवडा, झटपट तयार होईल रेसिपी

कामाच्या मधल्या वेळेत भूक लागते मग आता बाहेरचे पदार्थ विसरा आणि घरीच तयार करा केळीचा कुरकुरीत चिवडा. हा चिवडा तुम्ही अनेक महिने साठवून ठेवू शकता. (फोटो सौजन्य: istock)

कितीही जेवण केले तर मोकळ्या वेळेत किंवा संध्याकाळच्या ववेळी आपल्याला हलकी हलकी भूक लागायला सुरुवात होते. अनेकांना तर चहासोबत नेहमी काही तरी कुरकुरीत आणि चटपटीत खाण्याची सवय असते. अशावेळी नेहमी नाश्त्याला तेच तेच भजी बनवण्याऐवजी तुम्ही घरातच टेस्टी चिवडा बनवू शकता. तुम्ही अनेक प्रकारचा चिवडा खाल्ला असेल मात्र आज आम्ही तुम्हाला केळीपासून कुरकुरीत चिवडा कसा तयार करायचा याची एक सोपी रेसिपी सांगत आहोत.

ही रेसिपी फार कमी वेळेत तयार होते आणि मुख्य म्हणजे हे बनवण्यासाठी फार निवडक आणि सामान्य साहित्याची गरज भासते. हा चिवडा आपण कच्या केळीपासून तयार करणार आहोत. चला तर मग हा हटके चिवडा बनवण्यासाठी लागणारे साहित्य आणि कृती जाणून घेऊयात.

हेदेखील वाचा – तेलाचा एकही थेंब न वापरता बनवा हे नाश्त्याचे प्रकार, चवीबरोबरच आरोग्यासाठीही ठरेल फायदेशीर!

साहित्य

• 5-6 कच्ची केळी
• 1 चमचा शेंगदाणे
• काजूचे तुकडे – एक चमचा
• अर्धी वाटी खोबऱ्याचा किस किंवा कातळी
• 1 चमचा बेदाणे
• 1 चमचा तीळ
• मीठ
• हळद
• तिखट
• साखर
• तेल
• हिंग
• मोहरी
• धने-जिरेपूड

कृती

• केळ्यांचा चिवडा तयार करण्यासाठी सर्वप्रथम कच्या केळ्यांची साल काढून घ्या
• आता या केळ्यांचा किस करून घ्या
• त्यानंतर हा किस पाण्यात घाला
• नंतर हा किस एका कापडावर पसरवून घ्या
• यानंतर गॅसवर कढई ठेवा आणि यात तेल टाकून तेल गरम करून घ्या
• तेल गरम झाले की यात तयार किस टाकून कुरकुरीत तळून घ्या
• आता दुसऱ्या कढईत हिंग, मोहरीची फोडणी करून त्यावर शेंगदाणे, काजू तुकडे, खोबऱ्याच्या कातळ्या किंवा किस, बेदाणे, तीळ,
• एकामागून एक तळून घ्या
• मग यात तयार तळलेला कुरकुरीत केळ्यांचा किस टाका
• यानंतर वरून यात मीठ, साखर(पिठी), हळद, तिखट, धने-जिरे पूड घालून मिक्स करा आणि गॅस बंद करा
• अशाप्रकारे तुमचा ‘कच्चा केळींचा चिवडा’ तयार होईल