Recipe: बटाट्याची साल फेकू नका तर त्यापासून बनवा हा कुरकुरीत स्नॅक्स

तुम्हीही बटाट्याची साल फेकून देताय? मग आजच हे थांबवा आणि या सालींपासून तयार करा कुरकुरीत चिप्स. हे चिप्स फार कमी वेळेत आणि कमी साहित्यापासून बनून तयार होतात.

बटाटा ही भाजी अनेकांच्या आवडीची! यापासून अनेक निरनिराळे पदार्थ बनवले जातात. विशेष म्हणजे, बटाटा कशातही टाकला किंवा यापासून कोणताही पदार्थ बनवला तरी तो चवीला अप्रतिमच लागतो. बटाट्यापासून तुम्ही स्नॅक्सपासून ते जेवण आणि नाश्त्यापर्यंतचे अनेक प्रकार बनवू शकता. आता बऱ्याचदा या बटाट्याचा वापर करताना आपण याची साल काढून फेकून देतो. मात्र तुम्हाला माहिती आहे का? आता तुम्ही या सालींपासूनही एक चविष्ट आणि क्रिस्पी असा स्नॅक्सचा पदार्थ तयार करू शकता.

आज आम्ही तुमच्यासोबत बटाट्याच्या सालीचे चिप्स कसे तयार करायचे याची एक हटके पण स्वादिष्ट अशी रेसिपी शेअर करत आहोत. आम्हाला खात्री आहे, हे कुरकुरीत चिप्स तुमच्या घरातील सर्वांचेच मन जिंकेल. मुख्य म्हणजे, हे चिप्स फार कमी वेळेत आणि कमी साहित्यापासून तयार केले जातात. चला तर मग जाणून घेऊयात यासाठी लागणारे साहित्य आणि कृती.

हेदेखील वाचा – अजिबात चिकट न होता आंबट-तिखट भेंडीची भाजी कशी तयार करायची? नोट करा सोपी रेसिपी

साहित्य

• बटाट्याची साल
• तेल
• लाल तिखट
• जिरे पूड
• मीठ चवीनुसार

कृती

• बटाट्याच्या सालीचे कुरकुरीत चिप्स बनवण्यासाठी सर्वप्रथम बटाट्याची साल काढून घ्या
• यानंतर सर्व साली एकत्र करून पाण्याने स्वछ धुवून घ्या
• नंतर या साली एका भांड्यात काढा आणि यात लाल तिखट, जिरे पूड, मीठ टाकून मिक्स करा
• यानंतर गॅसवर एक कढई ठेवा आणि यात तेल टाका
• तेल गरम झाले की यात मसाल्यांमध्ये कोट केलेल्या बटाट्याच्या साली टाका
• आता मध्यम आचेवर या साली छान कुरकुरीत तळून घ्या
• तयार साली एका प्लेटीत काढा आणि तुमच्या आवडत्या सॉससोबत खाण्यासाठी सर्व्ह करा

हेदेखील वाचा – तीच तीच भाजी-चपाती खाऊन कंटाळला आहात? मग आजच घरी बनवा चमचमीत टोमॅटो पुलाव

बटाट्याच्या सालीचे फायदे:

• बटाट्याची साल आपल्या हृदयाचे आरोग्य निरोगी राखण्यास मदत करत असते कारण यात पोटॅशियम, मॅग्नेशियम आणि कॅल्शियम सारखे अनेक पोषक घटक आढळून येतात जे रक्तदाब नियंत्रित राखण्यास मदत करतात
• बटाट्याची साल फायटोकेमिकल्समध्ये समृद्ध आहे, हे एक शक्तिशाली अँटीऑक्सिडेंट आहे. त्याचबरोबर या सालींमध्ये क्लोरोजेनिक ॲसिड आढळून येते, ज्यामुळे कॅन्सरचा धोका बऱ्याच अंशी कमी होतो
• बटाट्याच्या सालीमध्ये अनेक महत्त्वाची खनिजे असतात, जे नैसर्गिकरित्या हाडे मजबूत करण्यास मदत करतात
• याचे कोणतेही दुष्परिणाम नसले तरी याचे अधिक प्रमाणात सेवन करणे शरीरासाठी हानिकारक ठरू शकते. त्यामुळे याचे सेवन पुरेशा प्रमाणात करावे. जर तुम्ही कोणत्याही आजाराने त्रस्त असाल तर डॉक्टरांचा सल्ला घेऊनच याचे सेवन करा