Raksha Bandhan Recipe: रक्षाबंधनाला भावासाठी घरच्या घरी बनवा नट्स चॉकलेट, कमी साहित्यापासून होते तयार

रक्षणबंधांचा सण अवघ्या काही दिवसांवरच आला आहे. या सणानिमित्त जर तुम्हाला आपल्या भावासाठी काही खास आणि हटके करायचे असेल तर तुम्ही आजची ही रेसिपी ट्राय करू शकता. तुमच्या भावाला ही रेसिपी निश्चितच फार आवडेल. तसेच कमी वेळेत आणि कमी साहित्यांपासून तुम्ही ही रेसिपी तयार करू शकता.

रक्षाबंधनाचा सण अवघ्या काही दिवसांवर आला आहे. हिंदू धर्मातील प्रमुख सणांपैकी हा सण आहे. यावर्षी 19 ऑगस्ट रोजी रक्षाबंधन साजरा केला जाणार आहे. बहीण-भावाच्या नात्यातील स्नेह जपणारा हा दिवस खूप खास आणि पवित्र मानला जातो. या दिवशी बहीण आपल्या भावाचे औक्षण करता त्याच्या हाताला राखी बांधते आणि भाऊ बहिणीला एक गोड भेटवस्तू गिफ्ट करतो.

अनेक महिलांची या दिवसासाठीची लगबग सुरु झाली आहे. राखी खरेदी करण्यापासून ते मेजवानीपर्यंत अनेक गोष्टी महिला आधीच ठरवून ठेवत असतात. रक्षाबंधनाला नेहमीच आपल्या भावाला काही गोड भरवण्याची परंपरा असते अशात यावेळी कोणतीही बाहेरची मिठाई न भरवता तुम्ही घरातच आपल्या भावासाठी खास नट्स चॉकलेट तयार करू शकता. हे चॉकलेट चवीला फार अप्रतीम लागते आणि अगदी कमी सामानापासून तयार होते. चाल तर मग यासाठी लागणारे आवश्यक साहित्य आणि कृती जाणून घेऊयात.

हेदेखील वाचा – उपवासाच्या दिवशी काही गोड खावेसे वाटतं असल्यास झटापट बनवा रताळ्याचा शिरा

साहित्य

• डार्क चॉकलेट – 350 ग्रॅम
• काजू – 50 ग्रॅम
• बदाम – 50 ग्रॅम
• मनुका – 50 ग्रॅम
• टुटी फ्रुटी – अर्धा कप
• बटर – 1 टीस्पून
• चॉकलेट बनवण्यासाठी मोल्ड

कृती

• नट्स चॉकलेट बनवण्यासाठी सर्वप्रथम तुम्हाला आवडेल तो साचा घ्या आणि बटरने याला ग्रीस करा
• आता चॉकलेट वितळवून घ्या, तुम्ही मायक्रोवेव्हमध्ये देखील चॉकलेट वितळवू शकता
• चॉकलेट वितळल्यानंतर यात तुमच्या आवडीचे सर्व नट्स आणि ड्रायफ्रुटस बारीक करून टाका आणि चॉकलेटमध्ये नीट मिक्स करा
• आता हे तयार चॉकलेटचे मिश्रण चमच्याच्या साहाय्याने साच्यात भरा
• आता हा साचा काही तास फ्रिजमध्ये ठेवा आणि चॉकलेट छान सेट होऊ द्या
• चॉकलेट सेट झाली की, बाहेर काढा आणि चॉकलेट रॅपरमध्ये या तयार चॉकलेटला छान गुंडाळा
• यानंतर डब्यात किंवा हॅम्परमध्ये सजवून हे चॉकलेट आपल्या भावाला गिफ्ट करा
• तुम्हाला हवे असल्यास तुम्ही यात डार्क चॉकलेटऐवजी व्हाईट चॉकलेटदेखील वापरू शकता