शुक्रवार, 16 ऑक्टोबर 2026
अनिल देशमुख यांच्याविरुद्ध गुन्हा दाखल (फोटो- टीम नवराष्ट्र)
महाविकास आघाडीचे सरकार असताना गृहमंत्री असणारे आणि राष्ट्रवादी काँग्रेस शरद पवार गटाचे आमदार अनिल देशमुख यांच्या अडचणीत वाढ झाली आहे. केंद्रीय अन्वेषण ब्युरो म्हणजेच सीबीआयने माजी गृहमंत्री अनिल देशमुख यांच्याविरुद्ध गुन्हा दाखल केला आहे. गिरीश महाजन यांच्याखोट्या गुन्ह्यात अडकवण्यासाठी जळगावच्या तत्कालीन पोलीस अधीक्षकांवर दवाब टाकल्याचा आरोप करत सीबीआयने देशमुखांविरुद्ध गुन्हा दाखल केला आहे.
सीबीआयने अनिल देशमुख यांच्याविरुद्ध गुन्हा दाखल केल्याने महाविकास आघाडीमध्ये एकच खळबळ उडाली आहे. राज्यात महाविकास आघाडीचे सरकार असताना तत्कालीन गृहमंत्री अनिल देशमुख यांच्याकडून विद्यमान मंत्री व आमदार गिरीश महाजन यांना खोट्या गुन्ह्यात अडकवण्याचा आरोपांखाली हा गुन्हा दाखल करण्यात आला आहे. गुन्हा दाखल झाल्यानंतर माजी गृहमंत्री अनिल देशमुख यांनी विद्यमान गृहमंत्री आणि उपमुख्यमंत्री देवेंद्र फडणवीसांवर निशाणा साधला आहे.
गिरीश महाजन यांच्या या प्रकरणात सीबीआयने अनिल देशमुख यांना आरोपी केले आहे. याआधी या प्रकरणात विशेष सरकारी वकील प्रवीण चव्हाण इतर काही जणांना आरोपी करण्यात आले आहे. या प्रकरणात जळगावचे तत्कालीन एसपी प्रवीण मुंढे यांनी अनिल देशमुख यांच्याविरुद्ध जवाब दिला होता. त्यानंतर सीबीआयने देशमुखांवर गुन्हा दाखल केला आहे. गुन्हा दाखल झाल्यानंतर देशमुखांची देवेंद्र फडणवीसांचे आभार मानले आहेत. किती खालच्या पातळीवर जाऊन राजकारण केले जात आहे असे देशमुख म्हणाले आहेत.
धन्यवाद…
देवेंद्रजी फडणवीस माझ्यावर #CBI कडून आणखी एक तथ्यहीन गुन्हा दाखल केला गेला आहे. जनतेचा कौल बघून फडणवीसांच्या पायाखालची वाळू घसरल्याने हे कटकारस्थान सुरू झाले आहे. या अशा धमक्यांना आणि दबावाला मी अजिबात भीक घालत नाही. न झुकता – न डगमगता मी #BJP च्या या दडपशाही… — ANIL DESHMUKH (@AnilDeshmukhNCP) September 4, 2024
गुन्हा दाखल झाल्यानंतर देशमुख यांनी ट्विट केले आहे. ”धन्यवाद…देवेंद्रजी फडणवीस. माझ्यावर #CBI कडून आणखी एक तथ्यहीन गुन्हा दाखल केला गेला आहे. जनतेचा कौल बघून फडणवीसांच्या पायाखालची वाळू घसरल्याने हे कटकारस्थान सुरू झाले आहे. या अशा धमक्यांना आणि दबावाला मी अजिबात भीक घालत नाही. न झुकता – न डगमगता मी #BJP च्या या दडपशाही विरुद्ध लढण्याची खूनगाठ बांधली आहे. महाराष्ट्रात फडणवीसांकडून किती खालच्या पातळीचे आणि विकृत मानसिकतेचे घाणेरडे राजकारण सुरू आहे ते जनतेने बघावे. लोकसभा निवडणुकीत या कारस्थानी नेतृत्वाला जनतेने जागा दाखवून दिली आहे, आता महाराष्ट्राची जनता विधानसभा निवडणुकीची वाट बघत आहे !” असे देशमुख आपल्या ट्विटमध्ये म्हणत आहेत.
विरोधी पक्षनेता असताना देवेंद्र फडणवीस यांनी विशेष सरकारी वकील प्रवीण चव्हाण आणि अनेक घटनांचा व्हिडीओ रेकॉर्डिंग असणारा पेनड्राइव्ह विधानसभेत सादर केला होता. आता याच प्रकरणात गिरीश महाजन यांना खोट्या गुन्ह्यात अडकविण्याचा आरोपांखाली सीबीआयने हा गुन्हा दाखल केला आहे. दरम्यान काही कालावधी आधी गिरीश महाजन यांनी देखील पत्रकार परिषद घेऊन देशमुख यांना याबद्दल जाब विचारला होता.
