रविवार, 18 ऑक्टोबर 2026
सर्वसामान्यांना बसतोय युद्धाचा फटका; जीवनावश्यक वस्तू महागल्या (फोटो- सोशल मिडिया)
भंडारा : आखाती देशांमध्ये सुरू असलेल्या युद्धाचे थेट परिणाम आता जाणवू लागले आहेत. जागतिक बाजारपेठ अस्थिर झाल्यामुळे घरगुती गॅस आणि खाद्यतेलाच्या किमतीत मोठी वाढ झाली. आधीच महागाईने त्रस्त असलेल्या सर्वसामान्यांना आता या जागतिक संघर्षाची मोठी किंमत मोजावी लागत असून, मध्यमवर्गीय आणि कामगार वर्गाचे आर्थिक बजेट पूर्णपणे कोलमडले.
देशाला ६० टक्क्यांहून अधिक एलपीजी आखाती देशातून आयात करावा लागतो. युद्धामुळे गॅस आणि कच्च्या तेलाचा पुरवठा विस्कळीत झाल्याने घरगुती गॅस सिलिंडरच्या दरात ६० ते ८० रुपयांची वाढ झाली असून, दर ९५० रुपयांच्या पार गेले आहेत. व्यावसायिक सिलिंडरच्या दरातही १५० रुपयांहून अधिक वाढ झाली. केवळ गॅसच नव्हे, तर खाद्यतेलाच्या किमतीतही प्रति लिटर १० ते १५ रुपयांची वाढ झाल्याने गृहिणींसमोर मोठा पेच निर्माण झाला.
उज्ज्वला योजनेअंतर्गत ग्रामीण भागात लाखो महिलांना गॅस कनेक्शन मिळाले आहे. असले तरी आता सिलिंडरचा तुटवडा आणि वाढत्या किमतींमुळे अडचणी निर्माण झाल्या आहेत. केरोसीन आधीच बंद झाल्याने आणि गॅस महागल्याने ग्रामीण भागात पुन्हा चुलीसाठी लाकडांची मागणी वाढली. तालुक्यातील जंगलांमध्ये वाघाची दहशत असतानाही महिलांना जीव मुठीत धरून सरपणासाठी भटकंती करावी लागत आहे. काही ठिकाणी हॉटेल व्यावसायिकांनी इलेक्ट्रक शेगडीचा वापर सुरू केला आहे. तर काही ठिकाणी चुली पेटल्याचे चित्र आहे.
पेट्रोल-डिझेल दरवाढीचे सावट
कच्या तेलाच्या वाढत्या किमतींमुळे पेट्रोल आणि डिझेलच्या दरातही वाढ होण्याची शक्यता वर्तवण्यात येत आहे. सध्या पेट्रोल १०४.५७ रुपये तर डिझेल ९१.२७ रुपये प्रति लिटरच्या आसपास आहे. ही दरवाढ अशीच सुरू राहिली तर वाहतूक खर्च वाढून बाजारपेठेतील भाजीपाला आणि धान्य अधिक महागण्याची भीती व्यापाऱ्यांकडून व्यक्त केली जात आहे. युद्धजन्य परिस्थितीमुळे निर्माण झालेली ही महागाई सर्वसामान्यांची उपासमार करणारी ठरू शकते.
सणासुदीच्या काळात सिलिंडरची अवैध विक्री
सणासुदीच्या काळात जीवनावश्यक वस्तूंचे दर वाढत असल्याने पैशांचा मेळ कसा घालावा? असा प्रश्न पडला. सरकारने लाडकी बहीण योजनेतून मदत दिली असली तरी गॅसची दरवाढ सर्वसामान्यांचे बजेट बिघडवणारी असल्याचे म्हटले जात आहे. गॅस एजन्सींकडे सिलिंडरचा तुटवडा असल्याने ग्राहकांना प्रतीक्षा यादीचा सामना करावा लागत आहे, ज्याचा फायदा घेत काही ठिकाणी घरगुती सिलिंडरची अवैध विक्रीही सुरू आहे.
हेदेखील वाचा : Maharashtra Politics : देशात एक आठवड्याचाही साठा शिल्लक नाही; LPG गॅसबाबत बड्या नेत्याच्या दाव्याने उडाली खळबळ
