मुंबईतून 10 लाखांची बनावट नाणी जप्त, धार्मिक स्थळांवर खोटे पैसे देत खरे पैसे घ्यायचे, वाचा काय आहे प्रकरण ?

दिंडोशी पोलिस ठाण्याचे वरिष्ठ पोलिस अधिकारी जीवन खरात यांनी दिलेल्या माहितीनुसार, बुधवारी रात्री दिल्ली पोलिसांच्या स्पेशल सेलचे पथक मुंबईत आले होते. दिल्ली पोलिसांनी सांगितले की, दिंडोशीच्या हद्दीत बनावट नाण्यांचा धंदा मोठ्या प्रमाणात सुरू आहे.

मुंबई – दिंडोशी पोलिस ठाण्याच्या हद्दीतील पुष्पा पार्क परिसरात 10 लाखांची बनावट तांबी आणि पितळेची नाणी जप्त करण्यात आली आहेत. ज्यामध्ये 1 रुपयांपासून 5 रुपये आणि 10 रुपयांच्या नाण्यांचा समावेश आहे. याप्रकरणी एका आरोपीला अटक करण्यात आली आहे. जिग्नेश गाला असे अटक करण्यात आलेल्या आरोपीचे नाव आहे. आरोपीविरुद्ध भादंवि कलम 232, 234, 235, 243, 120 (बी) अन्वये गुन्हा दाखल करण्यात आला आहे. जिग्नेशला त्याच्या गाडी आणि बनावट नाण्यांसह दिल्ली पोलिसांनी ताब्यात घेतले आहे. दिल्ली आणि दिंडोशी पोलिस यांनी संयुक्तपणे ही कारवाई केली. आरोपींच्या कारमधून ही नाणी जप्त करण्यात आली.

नाणी बनवण्याचा कारखाना हरियाणामध्ये
मिळालेल्या माहितीनुसार, नाणी बनवण्याचा कारखाना हरियाणामध्ये चालवला जात होता. ज्यामध्ये दिल्लीच्या स्पेशल सेलने कारवाई करत 5 जणांना अटक केली आहे. अटक करण्यात आलेल्या आरोपींकडून मिळालेल्या माहितीनुसार, हे लोक मुंबईत मोठ्या प्रमाणात बनावट नाणी आणायचे आणि धार्मिक ठिकाणी फुकट पैसे देण्याच्या नावाखाली खरे पैसे घेत. हा खोट्या नाण्यांचा खेळ बराच काळ सुरू होता.

 दिंडोशीच्या हद्दीत बनावट नाण्यांचा धंदा
दिंडोशी पोलिस ठाण्याचे वरिष्ठ पोलिस अधिकारी जीवन खरात यांनी दिलेल्या माहितीनुसार, बुधवारी रात्री दिल्ली पोलिसांच्या स्पेशल सेलचे पथक मुंबईत आले होते. दिल्ली पोलिसांनी सांगितले की, दिंडोशीच्या हद्दीत बनावट नाण्यांचा धंदा मोठ्या प्रमाणात सुरू आहे. या माहितीच्या आधारे दिंडोशी पोलिस स्टेशनचे पीआय कवडे आणि एपीआय गोकुळ पाटील यांच्या पथकाने दिल्ली पोलिसांसह मालाड पुष्पा पार्क येथील वल्लभ ए विंग सोसायटीमध्ये संयुक्त कारवाई केली, तेथून मोठ्या प्रमाणात बनावट नाणी जप्त करण्यात आली.