बुधवार, 21 ऑक्टोबर 2026
काही दिवसांपासून राज्यात भरदिवसा होणाऱ्या गोळीबाराच्या घटनांमध्ये वाढ झाली आहे.उल्हासनगरमध्ये झालेल्या गोळीबारात गणपत गायकवाड यांनी माजी नगरसेवक महेश गायकवाड यांच्यावर भर पोलीस स्थानकात गोळीबार केला. ही घटना ताजी असतानाच ठाकरे गटाचे माजी नगरसेवक अभिषेक घोसाळकर यांची फेसबूक लाईव्ह चालू असताना मॉरिस भाई याने गोळ्या झाडून हत्या केली. या घटनांमुळे राज्य कायदा आणि सुव्यवस्थेचे प्रश्न निर्माण झाले आहेत. अशीच घटना आज (शनिवारी) सायनमध्ये घडली आहे.
दारू पिताना झालेल्या वादातून गोळीबार
सायनमध्ये घडलेल्या घटनेत एक व्यक्ती गंभीर जखमी झाला आहे. त्याच्यावर सध्या रुग्णालयात उपचार सुरु आहेत. या गोळीबाराचा मुंबई पोलिस तसेच गुन्हे शाखेच्या अधिकाऱ्यांकडून तपास केला जात आहे. सायन कोळीवाडा परिसरात राहणाऱ्या एका व्यक्तीच्या घरात ही घटना घडली. दोन व्यक्तींमध्ये आपापसांत झालेल्या वादातून ही घटना घडली आहे. गोळीबारात जखमी झालेल्या व्यतीचे नाव आकाश स्वामी असे असून गोळीबार केलेल्या व्यकतीचे नाव विवेक चेत्तियार असे आहे. आकाश स्वामी हा व्यक्ती सायन कोळीवाडा परिसरातील एका चर्चच्या बाजूला एकटाच राहत होता. शनिवारी सकाळी दोन्ही आरोपी आकाशच्या घरी गेले. त्यानंतर त्यांनी त्यांच्या घराचा दरवाजा वाजवला.
आकाशने दरवाजा उघडल्यानंतर विवेकने त्याच्या हातामध्ये असलेल्या बंदुकीने आकाशवर दोन राऊंड फायर गोळ्या झाडल्या. यामध्ये आकाश गंभीर जखमी झाला आहे. विवेकने मारलेल्या गोळ्या आकाशाच्या पोटात लागल्या. या गोळीबारानंतर आकाशाला सायन रुग्णालयात उपचारासाठी दाखल करण्यात आले आहे. विवेक आणि आकाश यांच्यामध्ये दारू पिताना वाद झाला होता. या वादातून हा गोळीबार झाल्याचे समोर आले आहे. तसेच गोळीबारात जखमी झालेल्या आकाशावर २०१७ मध्ये हत्येचा प्रयत्न केल्याचा गुन्हा दाखल आहे. तर विवेकवर आधीच ७ वेगवेगळे गुन्हे नोंदवण्यात आले आहेत. अँटॉप हिल पोलिसांनी याप्रकरणी तपास सुरु केला आहे.
राज्य गोळीबाराने हादरले
काही महिन्यांपूर्वी कल्याणमध्ये गणपत गायकवाड यांनी महेश गायकवाड यांच्यावर गोळीबार केला होता. भर दिवसा पोलीस स्थानकात झालेल्या गोळीबारामुळे सगळीकडे भीतीचे वातावरण निर्माण झाले होते. त्यानंतर काही दिवसांनी फेसबुक लाईव्ह दरम्यान ठाकरे गटाचे माजी नगरसेवक अभिषेक घोसाळकर यांची गोळ्या झाडून मॉरिस भाई यांनी हत्या केली. या हत्येमुळे संपूर्ण राज्यात एकाच खळबळ उडाली होती. त्यानंतर मॉरिस भाई याने स्वतःवरच गोळ्या झाडल्या. यामध्ये मॉरिस भाईचा मृत्यू झाला. या घटनेनंतर राज्यात कायदा आणि सुव्यवस्थाचा प्रश्न निर्माण झाला होता.
