संतोष देशमुख हत्या प्रकरणातील आरोपी अटकेत; पुरावाही आहे पण न्याय अद्याप प्रलंबित (File Photo : Santosh Deshmukh Case)
मुंबई : मस्साजोगचे सरपंच संतोष देशमुख यांच्या हत्येनंतर महाराष्ट्रभर संतापाची लाट उसळली आहे. यामध्ये माजी मंत्री धनंजय मुंडे यांचा निकटवर्तीय असलेला वाल्मिक कराड हा या हत्येमागचा सूत्रधार असल्याचे आरोपपत्र समोर आले आहे. त्यानुसार, आत्तापर्यंत 7 आरोपींना अटक करण्यात आली आहे. मात्र, यातील आणखी एक आरोपी कृष्णा आंधळे हा अद्यापही फरार आहे. त्यावरच माजी मंत्री आणि शरद पवारांच्या राष्ट्रवादी काँग्रेसचे नेते जितेंद्र आव्हाड यांनी विधान केले आहे. ‘कृष्णा आंधळे जिवंत नाही, त्याची हत्या झालेली आहे’, असे आव्हाड यांनी म्हटले आहे.
जितेंद्र आव्हाड यांनी विविध मुद्यांवर भाष्य केले. ते म्हणाले, ‘धनंजय मुंडेंना महाराष्ट्र पेटेल म्हटल्यावर जबरदस्ती राजीनामा द्यायला लावला गेला. नाहीतर धनंजय मुंडेंनी राजीनामा दिला नसता. सरकारकडे हे फोटो होते, तरीही धनंजय मुंडेंना लपवण्याचे काम सरकार करत होते, असे ते म्हणाले. नागपूरच्या अधिवेशनात या सगळ्या घटनेचं वर्णन मी केलं होतं. या फोटोतील सगळं वर्णन माझ्या भाषणात होतं. संतोष देशमुखांच्या अंगावर लघुशंका करण्यात आली, हे देखील मी विधानसभेत सांगितलं होतं.
दरम्यान, सरकारला प्रश्न विचारायचा की, 90 दिवसांपासून हे सगळे फोटो तुमच्या ताब्यात होते. माहिती सरकारला होती, मग सरकार इतकं निर्दयी आहे? इतकी सगळी माहिती असतानाही धनंजय मुंडेंना लपवण्याचे काम करत होते, असा आरोपही त्यांनी केला आहे.
कृष्णा आंधळे जीवंत नाही
कृष्णा आंधळे हा जीवंत नाही, त्याची हत्या झालेली आहे. महादेव मुंडे यांची पत्नी सध्या उपोषणाला बसली आहे. तिला तरी न्याय द्या. रामकृष्ण बांगरांना न्याय द्या. किशोर फडच्या आई-वडिलांना बोलवून घ्या, त्याला न्याय द्या. बापू आंधळेच्या हत्या प्रकरणात न्याय द्या. मी अशा 15 हत्या प्रकरण संध्याकाळपर्यंत देतो आणि सरकारला आवाहन करतो की, तुम्ही हे गुन्हे दाखल करा आणि न्याय द्या, असेही त्यांनी म्हटले आहे.
…नाहीतर धनंजय मुंडेंनी राजीनामा दिला नसता
‘नैतिकता…’ हे फोटो काय दाखवत होते. या फोटोतून उद्रेक होईल. महाराष्ट्र पेटेल म्हटल्यावर धनंजय मुंडेंना जबरदस्ती राजीनामा द्यायला लावला. नाहीतर धनंजय मुंडेंनी राजीनामा दिला नसता’, असेही जितेंद्र आव्हाड यांनी म्हटले आहे.
