कुसुंबी घाट... लाल फुफाट्यातून प्रवास, नवीन मोऱ्या बांधकाम ठिकाणी मातीचे ढीग; दुचाकी चालकांसाठी धोकादायक प्रवास
विशेषता ज्या ठिकाणी नवीन मोऱ्यांचे बांधकाम सुरू आहे या ठिकाणी रस्ता खोदल्याने प्रचंड मातीचे ढीग तयार होत असून याठिकाणी मातीच्या ढिगाऱ्यातून दुचाकी चालकांसाठी प्रवास धोकादायक ठरत आहे. अशा ठिकाणी मोठे खड्डे पडून वाहने घसरत आहेत. त्यामुळे ज्या ठिकाणी मोऱ्यांची बांधकामे सुरू आहेत अशा ठिकाणी तरी मुरूम टाकून रस्ता वाहतुकीसाठी योग्य करावा अशी मागणी होत आहे.
शासनाकडून पाचवड ते खेड हा महत्त्वाचा रस्ता होत असून या रस्त्याचे काम वेगाने सुरू आहे. परंतु काम करत असताना आवश्यक त्या खबरदाऱ्या घेतल्या जात नाहीत. पाणी मारण्यासाठी टँकर असले तरी ते दिवसातून किती वेळा पाणी मारतात हा संशोधनाचा विषय आहे तर मेढा – कुसुंबी ते सह्याद्रीनगर घाटात तर एवढी माती रस्त्यावर आहे की एखादे वाहन वेगाने गेल्यास धुळीचे लोट तयार होत आहेत, यातून इतर चालकांना रस्ताही दिसेनासा होत आहे.
धुळीमुळे दुचाकी चालकांसह वाहनातील इतर प्रवासी, पादचारी, शेतकरी यांचे कपडे लालेलाल होत असून अनेकांना धुळीच्या त्रासामुळे श्वसनाचे विकार होत आहेत तर रस्त्याच्या जवळपास असणारी घरे व इतर व्यावसायिक ठिकाणे यामध्येही मातीचे थर साचत आहेत. उन्हाळ्याचे दिवस असल्याने वाऱ्याच्या वेगाने ही धूळ सर्वत्र पसरत असून या परिसरातील सर्व नागरिकांना धुळीच्या त्रासाने मेटाकुटीला आणले आहे. रस्त्याचे काँक्रिटीकरण होण्यासाठी अद्याप वेळ असून संबंधित ठेकेदाराने पाणी मारण्यासाठी असणारे टँकर पाणी मारताहेत की नाही याची खात्री करून रस्त्यावर दररोज पाण्याचा मारा करावा अशी मागणी होत आहे.
रस्त्याचे काम सुरू असल्याने रस्त्यावर बारीक खडीचे खडे मोठ्या प्रमाणावर असून या खडीमुळे दुचाकी व इतर गाड्या घसरण्याचे प्रमाण वाढले आहे. त्यामुळे वाहतुकीसाठी रस्ता सुरक्षित राहील याची काळजी संबंधित ठेकेदार ने घ्यावी अशी मागणी होत आहे.
