शनिवार, 18 जुलै 2026
मंडणगड – रिपब्लिकन पार्टी ऑफ इंडिया (ए) चे माजी तालुका अध्यक्ष राजेश गमरे म्हाप्रळ आंबेत पुल वाहतूकीसाठी खुला करावा या मागणीसाठी १६ सप्टेंबर २०२३ रोजी उपोषणास बसले आहेत. या संदर्भात मंडणगड तहसील कार्यालयाकडे ४ सप्टेंबर २०२३ रोजी निवेदन सादर करण्यात आले होते. या निवेदनातील तीन मागण्या पुर्ण करण्याचे आश्वासन प्रशासनाकडून मिळाले होते.
मात्र सावित्री नदीवरील म्हाप्रळ-आंबेत खाडीपूल वाहतूकीसाठी तात्काळ सुरु करण्याचे आश्वासनही पुर्तता न झाल्याने, संबंधीत कामाची उच्चस्तरीय चौकशी आंबेत पुल वाहतुकीस खुला करण्याच्या मागणीसाठी ते उपोषणास बसले आहेत. याचबरोबर तालुक्यातील शासकीय कर्मचारी मुख्यालयाच्या ठिकाणी राहत नसल्याने त्यांची चौकशी करुन संबंधीतांवर कारवाईची मागणी करण्यात आली होती, शहरातील पेट्रोल पंपावरील इंधन तुटवडा दुर करुन नागरीकांना नियमीतपणे इंधन पुरवठा व्हावा अशीही मागणी करण्यात आली होती.
तहसिलदार तानाजी शेजाळ व पोलीस निरिक्षक नितीन गवारे यांच्या मध्यस्थीने म्हाप्रळ आंबेत पुला संदर्भातील मागणी सोडता अन्य दोन मागण्या पुर्ण करण्यात यश आले आहे. दरम्यान राजेश गमरे यांच्या उपोषणास पार्टीचे तालुका अध्यक्ष राजेश साळवी, माजी तालुका अध्यक्ष राजेश गमरे, जयवंत जाधव, गणेश जाधव, राजेश खैरे, दिनेश राऊत, सौरभ खैरे, पांडुरंग जाधव, बाळाराम येलवे, रामचंद्र कवडे प्रतिक गमरे, अमर शिंदे यांच्यासह जेष्ठ व्यापारी जयंत देशमुख यांनी पाठींबा दिला आहे. तसेच विविध सामाजिक संघटना, राजकीय पक्ष यांनी उपोषणकर्त्यांची भेट घेऊन आपला पाठींबा दर्शविला आहे. संध्याकाळी उशीरापर्यंत उपोषण सुरु होते प्रशासकीय यंत्रणेकडे उपोषण मागे घेण्याविषयी कोणतीही चर्चा झालेली नाही.
