महाराष्ट्र विधानसभेच्या मतदानासाठी, राज्यभरात २ लाखांपेक्षा अधिक पोलीस, सुरक्षा यंत्रणांचे कर्मचारी तैनात

उद्या राज्यात विधानसभेच्या निवडणुकीसाठी मतदान पार पडत आहेत. निवडणूक प्रक्रिया शांततेत व पारदर्शक वातावरणात पार पडावी यासाठी राज्यभरात २ लाखांपेक्षा अधिक पोलीस व सुरक्षा कर्मचारी तैनात केले आहेत.

महाराष्ट्र विधानसभा निवडणूक २०२४ अंतर्गत बुधवार, २० नोव्हेंबर रोजी राज्यभर मतदान होणार आहे. निवडणूक प्रक्रिया शांततेत व पारदर्शक वातावरणात पार पडावी यासाठी राज्यभरात २ लाखांपेक्षा अधिक पोलीस व सुरक्षा कर्मचारी तैनात करण्यात आले आहेत. यात महाराष्ट्र पोलीस दलासोबत गृहरक्षक दल, नागरी संरक्षण दल, केंद्रीय सशस्त्र पोलीस दल, राज्य सशस्त्र पोलीस दल, आणि राज्य राखीव पोलीस दलाचा समावेश आहे. या सर्व सुरक्षा यंत्रणांना सतर्क राहण्याचे आणि कोणताही अनुचित प्रकार टाळण्यासाठी सजगतेचे आदेश देण्यात आले आहेत.

आचारसंहिता आणि तक्रारींची नोंद

यंदाच्या निवडणुकीसाठी १५ ऑक्टोबर २०२४ पासून आदर्श आचारसंहिता लागू करण्यात आली होती. या कालावधीत निवडणुकीशी संबंधित तक्रारींच्या आधारे एकूण ५३२ एफआयआर दाखल झाले आहेत. यापैकी २१० प्रकरणे आचारसंहिता भंगाशी, ६३ प्रकरणे समाज माध्यमांवरील गैरवापराशी, तर २५९ इतर मुद्द्यांशी संबंधित आहेत.

जिल्हानिहाय एफआयआरची आकडेवारी
राज्यभरातील विविध जिल्ह्यांमध्ये दाखल एफआयआरची संख्या पुढीलप्रमाणे आहे:
मुंबई शहर आणि उपनगर: ३६
ठाणे: ३८
पालघर: ०५
नाशिक:४९
धुळे: ०१
बीड: १८
अहिल्यानगर:** ३२
पुणे:४८
छत्रपती संभाजीनगर: २५
जालना: १०
जळगाव:१०
नंदुरबार: ०३
कोल्हापूर:२६
रत्नागिरी: १०
सिंधुदुर्ग:००
सातारा: १५
सांगली: ०८
सोलापूर:२८
लातूर: १२
धाराशिव:  ०६
रायगड: १९
परभणी: ०७
नांदेड: १५
हिंगोली: १२
यवतमाळ: ०७
वाशिम: ०३
वर्धा: ०६
अमरावती: १७
अकोला: ०२
बुलढाणा: ०८
चंद्रपूर:०३
गडचिरोली: ०६
भंडारा: १५
गोंदिया: ०३
नागपूर:२९

सुरक्षा व्यवस्थेचा उद्देश

राज्यात निवडणूक शांततेत पार पडावी, आदर्श आचारसंहितेचा भंग टाळला जावा, आणि कोणताही कायदा व सुव्यवस्थेचा प्रश्न निर्माण होऊ नये, यासाठी ही व्यापक सुरक्षा व्यवस्था केली आहे. निवडणूक प्रक्रिया पारदर्शक व निष्पक्ष ठेवण्यासाठी प्रशासनाने कठोर पावले उचलली आहेत.

सी-व्हिजिल (cVIGIL) ॲप

सी-व्हिजिल हे आदर्श आचारसंहिता आणि निवडणूक खर्चाच्या उल्लंघनाची तक्रार करण्यासाठी विकसित केलेले अभिनव मोबाइल ॲप आहे. याच्या मदतीने प्रत्येक नागरिक आपल्या स्मार्टफोनचा वापर करून छायाचित्रे, व्हिडिओ किंवा ऑडिओ स्वरूपात तक्रारी नोंदवू शकतो. ‘सी-व्हिजिल’चा अर्थ ‘सतर्क नागरिक’ असून हे ॲप आता मराठी भाषेतही उपलब्ध आहे, त्यामुळे स्थानिक नागरिकांसाठी ते अधिक सुलभ बनले आहे.

या ॲपच्या मदतीने निवडणूक काळातील आचारसंहिता उल्लंघनाच्या तक्रारी त्वरीत नोंदवल्या जातात. तक्रार नोंदविल्यानंतर जीपीएसच्या सहाय्याने उल्लंघनाचे ठिकाण अचूकपणे शोधले जाते. प्रशासन तक्रारीची स्थिती ट्रॅक करून 100 मिनिटांच्या आत तिची माहिती उपलब्ध करून देते. हे ॲप नागरिकांना निवडणूक प्रक्रियेत पारदर्शकता आणण्यासाठी आणि कायद्याचे पालन सुनिश्चित करण्यासाठी सक्षम करते. सी-व्हिजिल ॲप वापरणे सोपे असून ते गुगल प्लेस्टोअर आणि ॲपल स्टोअरवर उपलब्ध आहे.

डाउनलोड लिंक
[गुगल प्ले स्टोअर](https://play.google.com/store/apps/details?id=in.nic.eci.cvigil&hl=en_IN)
[ॲपल स्टोअर](https://apps.apple.com/in/app/cvigil/id1455719541)