सोमवार, 12 ऑक्टोबर 2026
काश्मिरी सफरचंद आता अवघ्या ३० तासांत मुंबईत! वाहतूक खर्चात ६०% कपात, रस्ते मार्गाऐवजी रेल्वे स्वस्त
Mumbai News: रस्त्यावरील अडथळे आणि हवामानाचा लहरीपणा यामुळे काश्मीरच्या फळबागा कायम अडचणीत यायच्या. मात्र आता जगातील सर्वात उंच रेल्वे पूल असलेल्या चिनाब पुलाने काश्मीरला देशाच्या बाजारपेठेशी थेट जोडले आहे. त्यामुळे सफरचंद, चेरीसारखा नाशवंत माल जलद आणि कमी खर्चात मुंबईपर्यंत पोहोचू लागला असून शेतकरी आणि ग्राहक दोघांनाही फायदा होत आहे.(फोटो सौजन्य – istock)
पूर्वी श्रीनगरहून मुंबईपर्यंत ट्रकने माल आणायचा म्हटला की ४५ तासांहून अधिक कालावधी लागत असे. जम्मू-श्रीनगर महामार्गावरील भूस्खलन, पावसामुळे रस्ता बंद होणे आणि वाहतूक कोंडी यामुळे माल सडण्याचे प्रमाण मोठे होते व्यापारी याच कारणामुळे शेतकऱ्यांकडून कमी दरात उचलत होते. चिनाब आणि अंजी केबल पूल कार्यान्वित झाल्यानंतर ही परिस्थिती बदलली आहे. आता बडगाम-कटरा-दिल्ली-मुंबई हा संपूर्ण रेल्वे कॉरिडॉर सुरू झाला असून मालगाड्या ताशी १०० किमी वेगाने धावत आहेत. त्यामुळे कश्मीरची प्रसिद्ध अशी अक्रोड, केशर, गालिचे आणि शाली उत्पादने थेट महाराष्ट्राच्या बाजारात उपलब्ध होत आहेत.
या नव्या मार्गामुळे दोन मोठे फायदे झाले आहेत. एक म्हणजे रस्ते मार्गे वाहतूक खर्च प्रति गोणी ८०-९० रुपयांवरून थेट रेल्वे मार्गे १०-१५ रुपये प्रति गोणी पर्यंत खाली आला आहे, म्हणजेच सुमारे ६० टक्के बचत. दुसरे म्हणजे माल खराब होण्याचे प्रमाण निम्म्यावर आले आहे. काश्मीरचे बागायतदार मोहम्मद अली शेख यांच्या मते, वेळेत आणि सुरक्षित वाहतुकीमुळे आता बागायतदारांना बाजारात चांगला दर मिळू लागला आहे.
रेल्वे अधिकाऱ्यांच्या माहितीनुसार, यंदा ३ जूनला कटरा येथून चेरीची पहिली २४ टनाची पार्सल व्हॅन निघाली आणि अवघ्या ३० तासांत वांद्रे टर्मिनसला पोहोचली. त्यापाठोपाठ १३ सप्टेंब २०२५ रपासून बडगाम ते दिल्लीच्या आदर्शनगरपर्यंत विशेष पार्सल सेवा सुरू करण्यात आली. १५ सप्टेंबर २०२५ नंतर आतापर्यंत २० हजार टनांपेक्षा जास्त सफरचंद रेल्वेने देशभरात पाठवण्यात आले आहे, ज्यातील मोठा हिस्सा मुंबई बाजारात आला आहे.
काश्मीरी फळांना महाराष्ट्रातील बाजारपेठ मिळवून देण्याची संधी चिनाब रेल्वे पूलामुळे निर्माण झाली. नियमित मालगाड्या, पार्सल क्षमतेची उपलब्धता आणि स्थानकांपासून घाऊक बाजारांपर्यंतची वाहतूक व्यवस्था यामुळे व्यापाराचा विस्तार वाढल्याने शेतकरी आणि व्यापारी समाधानी आहे, अशी माहिती – विनीत अभिषेक, मुख्य जनसंपर्क अधिकारी, पश्चिम रेल्वे यांनी दिली आहे.
